Müslüm Maqomayevin cənazəsi Vətənə gətirilmişdir

Zəmanəmizin görkəmli müğənnisi Müslüm Maqomayevin cənazəsi oktyabrın 28-də Bakıya gətirilmişdir.

Cənazəni Moskvadan gətirən xüsusi təyyarə yerli vaxtla saat 20.30 radələrində hava limanında yerə endi.

Əfsanəvi musiqiçinin ömür-gün yoldaşı Tamara Sinyavskaya da həmin təyyarə ilə Bakıya gəlmişdir.

Heydər Əliyev adına Beynəlxalq Hava Limanında matəm ovqatı vardı. Cənazəni gətirən təyyarəni mədəniyyət və turizm naziri vəzifəsini icra edən Əbülfəs Qarayev, Bakı Şəhər İcra Hakimiyyətinin başçısı Hacıbala Abutalıbov və digər rəsmi şəxslər, ziyalılar, incəsənət xadimləri qarşıladılar.

Müslüm Maqomayevin cənazəsi xüsusi avtomobilə – katafalka qoyularaq, paytaxtın Əjdərbəy məscidinə aparıldı.

Xalq qəzeti.- 2008.- 29 oktyabr.- S. 6.