Cəvahir

Azərbaycan cazı almanları heyrətləndirdi

Bu günlərdə Almaniyada keçirilən Azərbaycan günlərində cazmenlərimiz də çıxış edib. Tanınmış cazmen Salman Qənbərovun rəhbərlik etdiyi caz qrupu Almaniyanın müxtəlif şəhərlərində əcnəbilər qarşısında konsert verib. Yüksək səviyyədə keçən konsertlərdə Azərbaycan cazı fərqliliyi ilə əcnəbiləri heyrətləndirib. Ayaqüstü səfər təəssüratlarını bizimlə paylaşan Salman Qənbərov bundan hədsiz məmnun olduğunu söylədi.

Adətən muğamımızın bütün dünyanı fəth etməsi barədə xəbərlər alırdıq, amma vaxtilə Vaqif Mustafazadənin fəthindən sonra nədənsə cazmenlərimizdən bir səs-soraq çıxmırdı. Elə söhbətə də bununla körpü saldıq.

- Çoxdan idi ki, Azərbaycan cazmenlərinin xarici ölkələrdə konsertləri barədə xəbərlər almırdıq...

- Təəssüf hissilə qeyd etmək istəyirəm ki, üç il bundan əvvəl Azərbaycanı Almaniyada şou-biznes nümayəndələri təmsil edib. Amma şükürlər olsun ki, üç ildən sonra əcnəbilər qarşısına ciddi layihələrlə çıxırıq. Həmişə demişəm ki, qoy şou-biznes adamları burada toyxanalarda, konsertlərdə nə qədər istəyirlər pul qazansınlar, amma Biləcəridən o tərəfə gedib bizi biabır etməsinlər, həm hərəkətləri, həm də oxumaqları ilə, Azərbaycan musiqisini gözdən salmasınlar.

- Azərbaycan cazı əcnəbilər tərəfindən necə qarşılandı?

- Bir məqamı qeyd edim ki, əcnəbilər üçün fərqi yoxdur, tutalım, bu, Azərbaycan cazıdır, gürcü cazıdır, ya başqa xalqların cazı. Onlara dinləmək üçün mükəmməl musiqi lazımdır. Əcnəbilər yaxşı ifanı dəyərləndirirlər və oturub ləzzətlə dinləyirlər. Sadəcə, sən musiqiçi olaraq Azərbaycan musiqisini elə bir formada çatdırmalısan ki, xariciləri cəlb edə, maraqlandıra bilsin. Dinləyəndə fərqi tutsun ki, tutalım bu, Amerika musiqisi deyil və ondan daha fərqli bir musiqidir.

- Bizim tamaşaçı ilə əcnəbi tamaşaçı arasında fərq nədən ibarətdir?

- Onların bir xüsusiyyəti hər zaman məni cəlb edir, bu dəfə də şahidi oldum. Əcnəbilər konsertə minnətlə, candərdi gəlmirlər. Bahalı biletə pul xərcləyib gəlirlər və musiqi onların xoşuna gəlmirsə belə, yarımçıq zalı tərk etmirlər. Axıracan otururlar. Ola bilsin ki, bəyənmədiyi üçün növbəti dəfə sənin konsertinə gəlməsin, yaxud çıxışdan sonra kiməsə desin ki, musiqini bəyənmədim. Amma qapını çırpıb gedim, konsertin şirin yerində tappaturupla zalı tərk edim, digər tamaşaçılara və ifaçılara mane olum - bu mədəniyyətsizlik onlara xas deyil. Mənim aləmimdə önəmli olanı budur. İstərdim ki, Azərbaycan cazı inkişaf etsin və dünya cazının tərkibində olsun.

Mərkəz.- 2008.- 9 oktyabr.- S. 11.