Estrada müğənnisi
nələr söylədi?
Müasir
teleməkanda çoxsaylı musiqi müsabiqələrini seyr
edirik. Bəs sənət
adamlarının belə
müsabiqələrin keçirilməsinə
münasibəti necədir?
Xalq artisti, estrada mahnılarının
mahir ifaçısı
Natəvan Şeyxovaya
bu sualla müraciət etdik: "Bizim zamanımızda da belə yarışmalar
düzənlənirdi, amma
onlar televiziya ilə göstərilmirdi.
Bu müsabiqələr
mədəniyyət saraylarında
keçirilirdi. Ən
istedadlılar 1-ciliyi əldə
edəndən sonra onları televiziyaya çıxarırdılar. Bu
gün də məşhur olan sənətçilərin əksəriyyəti
həmin müsabiqələrdən
çıxan gənclərdir.
Hazırda isə əksinədir. Bütün
müsabiqələr başlayan
andan insanlara nümayiş etdirilir. Bunun da mənfi
təsiri çox olur. Çünki hər gün onları televiziyada seyr edən kiçikyaşlı uşaqlar
da müğənni olmağa can atırlar və onların dərslərə
olan həvəsi sönür. Bir yandan da belə
müsabiqələr tamaşaçıların
fikrini çaşdırır,
onlar yaxşı və ya pis
ifaçını ayırmaqda
çətinlik çəkirlər.
SMS sistemi də bir yandan çətinlik
törədir. Bəzən
ən pis ifaçıya SMS yağışı
yağır. Belə amillər gələcək
nəslin inkişafına
yaxşı təsir etmir. Mən demirəm televiziyalarda müsabiqələr yayımlanmasın,
müasir dövrdür,
olmalıdır, amma elə müsabiqələr
göstərilməlidir ki,
keyfiyyətli olsun. Bu işdə yalnız professionallar çalışmalıdır".
"Siz
estrada üzrə keçirilən müsabiqələrə
dəvətlər alırsınız" deyə sual
edəndə Natəvan xanım belə cavab verdi: "Belə
müsabiqələrə məni dəvət etmirlər,
səbəbini isə deyə bilmərəm. Bəlkə də bəzi müsabiqələrə
professional münsif üzvü lazım deyil, bu onlara
sərf etmir, ondandır. Nə bilim?".
Natəvan
xanım "bu gün Azərbaycanda estrada varmı"
sualına belə cavab verdi: "Bu gün bizdə estrada yoxdur
və bu janr yalnız formal xarakter daşıyır. Bu gün professional estrada
mahnılarına da tələbat var. Belə mahnılar hökmən yazılmalıdır. Bu gün həm bizdə, həm də dünya ölkələrinin çoxunda
retro mahnılara üstünlük
verirlər. Çünki o mahnılar peşəkarlıqla
yazılıb. Bu üzdən də yüksək pillədən
düşmür. Belə mahnıları
oxuduqca oxumaq istəyirsən. İndi yazılan
mahnılar isə ifa edildiyi gündən
bir neçə gün sonra yaddan çıxır, çünki peşəkarlıqla
işlənməyib".
Həftə içi.- 2008.- 24 oktyabr.- S. 8.