II Respublika Azsaylı Xalqların İncəsənəti festivalı başlayıb

"Azərbaycan doğma diyar" devizi altında II Respublika Azsaylı Xalqların İncəsənəti festivalı başlayıb. APA-nın məlumatına görə, Mədəniyyət və Turizm Naziliyinin təşkilatçılığı ilə keçirilən festival çərçivəsində dünən Muzey Mərkəzində "Milli azlıqların mədəni irsinin qorunması" mövzusunda dəyirmi masa keçirilib. Mədəniyyət və Turizm nazirinin müavini Sevda Məmmədəliyeva bildirib ki, festivalın keçirilməsində məqsəd Azərbaycanda yaşayan milli azlıq və etnik qrupların mədəni irsinin qorunub saxlanması və inkişaf etdirilməsi, habelə xalqlar arasında qarşılıqlı anlaşma və tarixi dostluq münasibətlərinin möhkəmləndirilməsi məqsədi daşıyır. Mədəniyyət və Turizm Nazirliyinin şöbə müdiri Fikrət Babayev isə artıq ikinci dəfədir ki, keçirilən bu festivalın önəmliliyindən danışıb: "Bu festival ilk dəfə 2006-cı ildə keçirilib və çox yüksək qarşılanıb. Bu festivalda da Azərbaycanda yaşayan bütün azsaylı xalqların nümayəndələri iştirak edir. Ümumilkdə isə festivalın 500-ə yaxın iştirakçısı var".

Festival çərçivəsində Azərbaycan Dövlət Musiqili Komediya Teatrında bədii kollektivlərin çıxışlarına baxış keçirilib. Oktyabrın 9-da isə "Azərbaycan doğma diyar" II Respublika Azsaylı Xalqların İncəsənəti festivalı yekun konserti ilə başa çatacaq.

İki sahil.- 2008.- 9 oktyabr.- S. 16.