Nəsibə xanımdan ana qayğısı görmüşəm

İlham Namiq Kamal korifey sənətkar haqqında danışdı

Noyabrın 1-də Moskvanın "Ostankino" zalında korifey sənətkarımız Nəsibə Zeynalovanın 90 illik yubileyi qeyd olunacaq. Tədbiri Moskvada aktyorun adını daşıyan Estrada Teatrı və ÜAK üzvləri təşkil ediblər. Teatrın rəhbəri Sərxan Kərəmoğlunun "Kaspi"yə bildirdiyinə görə, tədbirə bir sıra sənət adamlarının adları daxil edilib. O, Musiqili Komediya Teatrının aktyorları, Bələdiyyə Teatrının rəhbəri Amaliya Pənahova, aktyor İlham Namiq Kamal və müğənni Flora Kərimovanın da proqramda iştirak edəcəyini bildirib.

Mərhum sənətkar haqqında danışan İlham Namiq Kamal onu əvəzolunmaz sənətkar və fədakar ana adlandırdı: "Məmnunam ki, noyabrın 1-də Moskvada keçiriləcək sənətkarın 90 illik yubiley proqramına mənim də adım daxil olunub. Çalışdığım Musiqili Komediya Teatrının kollektivi ilə birlikdə gecəyə həvəslə hazırlaşırıq. Orada Nəsibə xanım haqqında xoş fikirlər səsləndiriləcək və eyni zamanda oynadığı tamaşalardan parçalar göstəriləcək".

Nəsibə xanımla "Qayınana" filmində yaxın tərəf-müqabil olduğunu deyən İlham Namiq Kamal bunun üçün mərhum reyissor Hüseyn Seyidzadəyə həmişə minnətdar olduğunu söylədi: "Nəsibə xanım bizə ana qayğısı ilə yanaşardı. Film boyu onun bizimlə səmimi münasibəti və eyni zamanda ana qayğısı çəkiliş qrupunun xatirələrində xoş anlarla qalıb. Aktyorluq sənətində onun kimi şəxsiyyətlər nadir hallarda yetişir".

Kaspi.- 2008.-25-27 oktyabr.- S. 16.