Rus Dram Teatrı Qəbələdən qayıdıb

İki həftə bundan qabaq Səməd Vurğun adına Rus Dram Teatrı Qəbələ rayonunda yerləşən RLS-in komandanlığından dəvət alıb. Hərbçilər və onların ailələri Rusiya Kosmik Qoşunlar və Ümumdünya Müəllim günləri münasibəti ilə teatrın artistlərini bu rayonda görmək istəklərini dilə gətiriblər.

Rus Dram Teatrının baş reyissoru Aleksandr Şarovskinin sözlərinə görə, hərbi hissənin ərazisində təhsil Azərbaycan və rus dilllərində olan məktəb mövcuddur. "Bizdən xahiş etmişdilər ki, rus dramaturgiyasından olan tamaşa ilə qarşılarına çıxaq. Biz akt zalında çıxış etdik. Həmin məkanda isə səhnə böyük deyildi. Ona görə də rus dramaturqu Lüdmila Razumovskayanın "Nikah agentliyi 1+" pyesini seçdik".

Qeyd edək ki, sözügedən tamaşada teatrın aparıcı artistləri Səfa Mirzəhəsənov, Yevgeniya Nevmeryiskaya, Rita Əmirbəyova, Aleksandr Nikuşina, Yelena Spisına, Ruqiyyə Quliyeva iştirak edirlər. 14 nəfərdən ibarət nümayəndə heyəti akt zalında iki dəfə tamaşa oynayıb.

A.Şarovski deyir: "Rusiyalı hərbçilərin artistlərimizi ürəkdən alqışlaması çox riqqətli idi. Çoxları mənə yaxınlaşıb deyirdi ki, Bakıya gəlib tamaşalarımıza baxmağa imkanları yoxdur. Ona görə də bizim gəlişimiz onlar üçün çox sevindirici idi".

Kaspi.- 2008.- 10 oktyabr.- S. 16.