Ağazadə Z.

Opera müğənnisi Fidan Hacıyevanın Kiyevdə konserti böyük uğurla keçmişdir

Oktyabrın 6-da N.Lısenko adına Ukrayna Milli Filarmoniyasının Sütunlu salonunda Azərbaycanın Müstəqillik gününə həsr edilmiş bayram konserti olmuşdur. Bu gözəl tədbir Azərbaycanın Ukraynadakı səfirliyi, iki ölkənin Mədəniyyət və Turizm nazirlikləri, Ukrayna-Azərbaycan Dostluğu Beynəlxalq Xeyriyyə Fondu (UADBXF) tərəfindən təşkil olunmuşdur.

Gecəni Azərbaycanın əməkdar artisti, tanınmış teleaparıcı, jurnalist və rejissor Rafiq Həşimov və Ukraynanın əməkdar artisti İnna Kapinos aparmışlar.

Azərbaycanın Ukraynadakı səfiri Tələt Əliyev və Milli Məclisin deputatı Novruz Aslanov ulu öndər Heydər Əliyevin Azərbaycanın ən yeni tarixindəki müstəsna rolundan, respublikamızın daxili və xarici siyasətdə qazandığı böyük uğurlardan, Azərbaycan və Ukrayna xalqları arasındakı əbədi dostluqdan və bir çox digər məsələlərdən söhbət açmışlar. Konsertin sponsoru - UADBXF-ın prezidenti İlqar Abbasov tədbir iştirakçılarına vaxtlarını xoş keçirməyi arzulamış, Azərbaycan Mədəniyyət və Turizm Nazirliyinin nümayəndəsi Vaqif Bəhmənli isə ona ümummilli lider Heydər Əliyevin portretini təqdim etmişdir.
Azərbaycanın mədəniyyət və turizm naziri Əbülfəs Qarayevin və onun ukraynalı həmkarı Vasıli Vovkunun təbrik məktubları oxunmuşdur.
Konsertdə Azərbaycan Dövlət Akademik Opera və Balet Teatrının solisti, əməkdar artist, beynəlxalq müsabiqələr laureatı Fidan Hacıyeva və Ukrayna Milli Operasının solisti, xalq artisti Aleksandr Qurets çıxış etmişlər. Onları fortepianoda Azərbaycanın əməkdar incəsənət xadimi, tanınmış cazmen Cavan Zeynallı və beynəlxalq müsabiqələr laureatı Anastasiya Titoviç müşayiət etmişlər.

Azərbaycan opera səhnəsinin ulduzu öz parlaq istedadı ilə Azərbaycan və Ukrayna bəstəkarlarının, eləcə də xarici bəstəkarların əsərlərini məharətlə ifa edərək tələbkar dinləyicilərin ürəklərini fəth etmişdir. Konsertdə Üzeyir Hacıbəylinin, Tofiq Quliyevin, Rauf Hacıyevin, Jorj Bizenin, Cüzeppe Verdinin, Corc Gerşvinin, Petro Batyukun və başqalarının əsərləri səslənmişdir.

Ukrayna hakimiyyət orqanlarının, Kiyevdə akkreditə olunmuş diplomatik korpusun nümayəndələri, GUAM-ın baş katibi Valeri Çeçelaşvili, Ukrayna yanacaq və energetika nazirinin müavini Burzu Əliyev, diasporumuzun təmsilçiləri konsertdə olmuşlar. "Yeni Azərbaycan" qəzetinin ölkələrimizin dostluq münasibətlərinə həsr edilmiş xüsusi buraxılışının nüsxələri tədbir iştirakçılarına paylanmışdır.

Fidan Hacıyeva AzərTAc-ın müxbirinə müsahibəsində bu gözəl konsertə görə təşkilatçılara, səhnə ustalarını səmimi qarşılayan dinləyicilərə minnətdarlığını bildirərək demişdir: "Bu, mənim Ukrayna səhnəsində ikinci çıxışımdır. Tələbkar Kiyev dinləyicilərinin yaradıcılığına verdiyi qiymət məni daha da ruhlandırır".

Azərbaycan.- 2008.- 11 oktyabr.- S. 8.