ÜNS yaradıcılıq səhnəsində İtaliya musiqisi gecəsi

 

Bu günlərdə ÜNS yaradıcılıq səhnəsində bakılıların böyük marağına səbəb olmuş İtaliya opera musiqisi gecəsi keçirilmişdir. Gecənin iştirakçılarından biri, Moskvadakı Helikon operanın aparıcı solisti, Rusiyanın əməkdar artisti, vokalçıların beynəlxalq müsabiqələrinin laureatı Marina Karpeçenko idi.

Misilsiz soprano səsi olan M.Karpeçenko məşhur italyan bəstəkarları Verdinin "Traviata", Puççininin "Toska", Rossininin "Neapol tarantellası" operalarından ariyalar və başqa əsərlər ifa etmişlər.

Respublikanın əməkdar artisti Samir Cəfərovun solo çıxışı, xüsusən də onun ifasında Verdinin "Riqoletto" operasından Hersoqun, Puççininin "Toska" operasından Kavaradossinin ariyaları dinləyicilər tərəfindən alqışlarla qarşılanmışdır.

Konsertdə Marina Karpeçenko və Samir Cəfərovun ifasında duetlər də səslənmişdir. Onların məharətlə oxuduqları "Traviata" operasından Violetta və Alfredonun təsirli dueti tamaşaçıların sürəkli alqışlarına səbəb olmuşdur.

Moskvalı müğənni ilk dəfə deyildir ki, Bakıya gəlir. O, bir neçə il əvvəl elə bu səhnədə "Karmen" operasında uğurla çıxış etmişdi. Karpeçenko o vaxt necə yaxşı qarşılandığını, bu şəhərdə əsl yüksək musiqi xiridarlarının pərəstişkarlarının yaşadığını əsla unutmamış, budəfəki dəvəti böyük məmnuniyyətlə qəbul etmişdir.

Konsert öz heyranlıqlarını gurultulu alqışlarla ifadə edən dinləyicilərə əsl fərəh, bayram əhval-ruhiyyəsi bəxş etmişdir.

 

                 Res­pub­lika.- 2008.- 23 oktyabr.- S. 3