Bakıda Belarus Mədəniyyəti Günlərinin təntənəli açılışı olmuşdur

Oktyabrın 22-də Dövlət Musiqili Komediya Teatrında Azərbaycanda Belarus Mədəniyyəti Günlərinin təntənəli açılışı olmuşdur.

Tədbiri giriş sözü ilə açan mədəniyyət və turizm naziri Əbülfəs Qarayev bildirmişdir ki, Azərbaycan və Belarus prezidentlərinin qarşılıqlı səfərlərindən sonra ölkələrimiz arasında bütün sahələrdə olduğu kimi, mədəniyyət sahəsində də əlaqələr xeyli genişlənmiş, yeni mərhələyə qədəm qoymuşdur. Mədəniyyətlərimizin qarşılıqlı təbliği, sənət adamlarımızın əməkdaşlığı xalqlarımız arasında qədim tarixə malik əlaqələrə yeni təkan verməkdədir.

Ə.Qarayev demişdir ki, hər iki respublikada mədəniyyət və incəsənət xadimlərinin bir-birini yaxından tanıması, əməkdaşlıq etməsində belə tədbirlərin mühüm əhəmiyyəti vardır.

Nazir vurğulamışdır ki, Belarus mədəniyyət xadimlərinin Azərbaycana gəlişi bizim üçün əsl bayramdır. Biz bu gün Belarus xalqını təmsil edən incəsənət ustalarının çıxışlarından xüsusi zövq alacağıq.
Tədbirdə Belarus mədəniyyət nazirinin müavini Vladimir Qridyuşko Azərbaycana böyük bir nümayəndə heyəti ilə gəldiklərini bildirmişdir. Artıq bakılılar Belarus rəssamlarının əsərləri, filmləri, incəsənəti ilə tanış olmaq imkanı qazanmışlar.

Azərbaycanda onlara göstərilən doğma münasibətdən razılıqla danışan Vladimir Qridyuşko demişdir ki, mədəniyyət xadimlərimiz arasında mövcud olan bu məhsuldar əməkdaşlıq bundan sonra da davam etdiriləcəkdir.

Gecədə Belarusun mədəniyyət ustaları geniş konsert proqramı ilə çıxış etmişlər.

Azərbaycan.- 2008.- 23 oktyabr.- S. 5.