Mükərrəmoğlu M.

Azərbaycanda Belarus mədəniyyəti günləri

Azərbaycan Respublikası ilə Belarus Respublikası arasında ticarət-iqtisadi əməkdaşlıq üzrə Hökumətlərarası Komissiyanın IV iclasının 2008-ci il 27 mart tarixli Protokoluna uyğun olaraq, 2008-ci il 22-24 oktyabr tarixlərində Azərbaycanda Belarus Respublikasının mədəniyyət günləri keçiriləcək. Mədəniyyət və Turizm Nazirliyinin mətbuat xidmətindən bildirmişlər ki, Azərbaycana gələn 80 nəfərlik nümayəndə heyətinə Belarus Respublikasının mədəniyyət nazirinin müavini Vladimir Qridyuşko rəhbərlik edir. Rəsmi nümayəndə heyətinin tərkibinə Belarus Respublikasının Milli Akademik Böyük Balet Teatrının direktoru və bədii rəhbəri ValentinYelizaryev, Mədəniyyət Nazirliyinin Beynəlxalq əlaqələr şöbəsinin müdiri Mixail Kacuro daxildirlər.

Bədii kollektivləri Belarus Respublikasının dövlət rəqs kollektivi, əməkdar kollektiv “Syabrı” ansamblı, İrina Dorofeyevanın Mahnı Teatrı, beynəlxalq müsabiqələr laureatı Günəş Abbasova, Uşaq “Avroviziya” müsabiqəsinin qalibi Kseniya Sitnik, Beynəlxalq müsabiqələr laureatı Pyotr Yelfimov, konsertin aparıcısı Yelena Spiridoviç, Belteleradio Şirkətinin çəkiliş qrupu və başqaları daxildirlər. Səfər çərçivəsinə Belarus Respublikasının xalq rəssamı Q.X.Vaşşenkonun yağlı boya ilə işlənmiş 35 əsərindən ibarət fərdi sərgisi də daxildir. Mədəniyyət günləri çərçivəsində Azərbaycan Kinematoqrafçılar İttifaqında “Qara pişiyin belində” və “Vətən qalxanı” Belarus filmləri nümayiş olunacaq. Bu gün Belarus nümayəndə heyəti Fəxri Xiyabanı və Şəhidlər Xiyabanında əklilqoyma mərasimində iştirak edəcək, AR mədəniyyət və turizm naziri Ə.Qarayevlə görüşəcək və mətbuat konfransı keçiriləcək.

Eyni zamanda, Kinematoqrafçılar İttifaqının kinozalında Belarus filmlərinin nümayişi və Bədii Sərgi Salonunda Q. X. Vaşşenkonun fərdi sərgisinin açılışı olacaq.

Belarus mədəniyyət günlərinin ilk günü Dövlət Musiqili Komediya Teatrında Belarus Respublikasının mədəniyyət günlərinin açılış mərasimi və konsertlə başa çatacaq.

Belarus nümayəndə heyəti oktyabrın 23-də Sumqayıt şəhərində olacaq, burada sumqayıtlılarla görüş və konsert proqramı nümayiş etdiriləcək. Həmin gün Mahnı Teatrında İrina Dorofeyevanın Mahnı Teatrının konserti, eyni zamanda, Kinematoqrafçılar İttifaqının kinozalında Belarus filmlərinin nümayişi keçiriləcək. Sumqayıtda isə yenidən Belarus nümayəndələrinin iştirakı ilə konsert olacaq.

Oktyabrın 24-də isə Belarus Respublikası mədəniyyəti günlərinin bağlanış mərasimi keçiriləcək.

Xalq qəzeti.- 2008.- 21 oktyabr.- S. 7.