Bakıda Tatarıstan mədəniyyət günlərinin təntənəli açılışı olmuşdur

Oktyabrın 4-də Dövlət Musiqili Komediya Teatrında Azərbaycanda Tatarıstan Mədəniyyəti günlərinin təntənəli açılışı olmuşdur.

Tədbiri giriş sözü ilə açan mədəniyyət və turizm naziri Əbülfəs Qarayev bildirmişdir ki, rəhbərlik etdiyi qurum ilə Rusiya Federasiyası Tatarıstan Respublikasının Mədəniyyət Nazirliyi arasında imzalanmış mədəni əməkdaşlıq üzrə tədbirlər planına əsasən, son vaxtlar bir sıra işlər görülmüşdür. Mədəniyyətlərimizin qarşılıqlı təbliği, sənət adamlarımızın əməkdaşlığı xalqlarımız arasında qədim tarixə malik əlaqələrə yeni təkan verməkdədir.

Nazir vurğulamışdır ki, Tatarıstan mədəniyyət xadimlərinin Azərbaycana gəlişi bizim üçün əsl bayramdır. Biz bu gün qardaş xalqı təmsil edən incəsənət ustalarının çıxışlarından xüsusi zövq alacağıq.
Tatarıstan Baş nazirinin müavini, mədəniyyət naziri Zilya Valeyeva demişdir ki, bugünkü səfər Azərbaycan və Tatarıstan arasında siyasi, iqtisadi, mədəni əlaqələrin dinamik inkişafından xəbər verir. Mədəniyyət sahəsində əməkdaşlığımız və xalqlarımızın eyni dildə danışması bir daha sübut edir ki, azərbaycanlılar və tatarlar əsrlər boyu bir-birinə doğma olmuşlar. Əcdadlarımız bir vaxtlar Böyük İpək yolu ilə bir addımlamışlar.

Zilya Valeyeva demişdir ki, ulu öndər Heydər Əliyevin Azərbaycana ikinci dəfə rəhbərlik etdiyi illərdə bu dostluq, qardaşlıq daha da möhkəmlənmiş və özünün yeni dövrünə qədəm qoymuşdur. Heydər Əliyev böyük dövlət xadimi kimi Azərbaycanın inkişafı üçün misilsiz işlər görmüş, öz xalqının çətin dövründə ona dayaq olmuşdur.
Azərbaycanda onlara göstərilən doğma münasibətdən razılıqla danışan Zilya Valeyeva bildirmişdir ki, mədəniyyət xadimlərimiz arasında mövcud olan bu məhsuldar əməkdaşlıq bundan sonra da davam etdiriləcəkdir.

Sonra tatarıstanlı qonaq Əbülfəs Qarayevə xalqlarımız arasında mədəni əlaqələrin inkişafındakı xidmətlərinə görə fəxri fərman təqdim etmişdir.

Gecədə Tatarıstanın mədəniyyət ustaları geniş konsert proqramı ilə çıxış etmişlər

Azərbaycan.- 2008.- 5 oktyabr.- S. 7.