Rəhimli İ.

Ülviyyət və idrakın təntənəsi

Hindistanın görkəmli ictimai-siyasi xadimi İndira Qandinin epiqraf kimi verdiyim müdrik kəlamının məna və fəlsəfi tutumu yazımın qəhrəmanının qüdrətini ehtiva edə biləcək bəlkə də ən tutarlı fikirdir. Mən insanlara sevgisində, uşaqlara məhəbbətində, xalqına, xalqının mədəniyyətinə vurğunluqda və onun təəssübkeşliyində, qətiyyətli inadcıllığında dünya səviyyəsində örnək olan bir xanım barədə söhbət açmaq istəyirəm.

Hər bir fərdin sırf özünəməxsus ömür payı var. İnsan həmin ömür yolunu elə keçməlidir ki, baxanlar orada qoyulan izlərin xeyirxahlıq və qüdsiyyət çəkisini görə bilsinlər. Görüb qiymətləndirsinlər.

Qiymətləndirib onu gələcək nəsillərə ərməğan versinlər.

İngilislərdə belə bir müdrik deyim var. Bir cavan yaxınlaşıb aqil qocadan soruşur:

- Kamil insan olmaq üçün nə etmək lazımdır?

Pirani qoca belə cavab verir:

- Üç kollec qurtarmaq lazımdır.

Gənc təəccüblənir və sual verir:

- Nə üçün məhz üç?

Mütəfəkkir gülümsəyib deyir:

- Kollecin birini baban, birini atan, birini də sən qurtarmalısan.
Əvvəlcə adi bir şəxsiyyət kimi yanaşaq. Mehriban Əliyevanın ata babası məşhur yazıçı, pedaqoq, filologiya elmləri doktoru, professor Mir Cəlaldır. Ana babası Azərbaycan jurnalistikasının korifeylərindən olan Nəsir İmanquliyevdir. 1940-cı illərdən 1990-cı illərə qədər ən məşhur jurnalistlərimiz, necə deyərlər, Nəsir müəllimin əlindən su içiblər. Mehriban Əliyevanın atası Arif Paşayev fizika-riyaziyyat elmləri doktoru, professor, Milli Aviasiya Akademiyasının rektorudur. Anası Aida xanım İmanquliyeva dünya miqyasında tanınan filoloq, şərqşünas alim idi. Onun milli şərqşünaslıq, xüsusən ərəbşünaslıq elmimizə verdiyi töhfələr çox qiymətlidir.

Mehriban xanım özü 1982-ci ildə Bakıdakı 23 saylı orta məktəbi qızıl medalla bitirərək Nəriman Nərimanov adına Azərbaycan Dövlət Tibb İnstitutuna daxil olub. 1988-ci ildə M. Seçenov adına Birinci Moskva Dövlət Tibb İnstitutunu fərqlənmə diplomu ilə qurtarıb. 1988-1992-ci illərdə Moskvada akademik Krasnovun rəhbərliyi ilə Göz Xəstəlikləri Elmi Tədqiqat İnstitutunda işləyib.

Üstəlik də Mehriban xanımın adı dünyanın dahi siyasətçiləri ilə bir cərgədə çəkilən, Azərbaycan xalqının ümummilli lideri, ulu öndər Heydər Əliyevin və görkəmli oftalmoloq alim, akademik Zərifə xanımın gəlinidir. Bu gün dünyanın ən cavan və kamil prezidentlərindən olan İlham Əliyevin ömür-gün yoldaşıdır. Məmləkətimizin baş xanımıdır. Şahanə zərifliyi, ecazkar füsunkarlığı, incə məlahəti, zəngin və çoxşaxəli ictimai fəaliyyəti, heyranlıq doğuran kamalı ilə dünyanın baş lediləri arasında xüsusi cazibədarlığa və lütfkarlığa, izzətə və ehtirama malikdir.
Deməli, Mehriban xanım Əliyeva, ingilislər demişkən, üç yox, daha çox kollec təhsili alıb. Hətta fəlsəfə elmi üzrə dissertasiya müdafiə edib, alimdir.

Mən yazımın bu yerində Mehriban xanım Əliyevanın kimliyini oxucularımın daha dərindən qavramaları, yazımın məqsəd və məramını aydın duymaları üçün bir kod-açar vermək istəyirəm. İstəyirəm ki, oxucular Mehriban xanımın şəxsiyyət böyüklüyünə məhz bu ölçü-meyarlarla yanaşsınlar. Onda azərbaycanlı Mehriban Arif qızı Əliyevanın, ziyalı Mehriban xanımın, ictimai xadim, millət vəkili Mehriban Əliyevanın, xeyriyyəçi əməlpərvər, insansevər Mehriban xanım Əliyevanın obrazının qüdrət və qüdsiyyəti daha bitkin və daha möhtəşəm görünər.

Çin filosofu Lao Tszı (e.ə. V əsr) yazıb: "Kim adamları tanıyırsa - arifdir; özünü tanıyırsa - ağıllıdır; adamlara qalib gəlirsə - güclüdür; özünə qalib gəlirsə - qüdrətlidir; biliyi çoxdursa - dövlətlidir; inadkardırsa - iradəsi var; təbiətini dəyişmirsə - uzunömürlüdür".

Mehriban xanım Əliyeva idrakı ilə arif, elmi potensialı ilə ağıllı, parlaq zəkası ilə güclü, qətiyyəti və işgüzarlığı ilə qüdrətli, təfəkkür aydınlığı ilə dövlətli, başladığı möhtəşəm layihələri hünərvərliklə başa çatdırmaq səyi ilə iradəli, xalqımızın mədəniyyəti və təhsili üçün gördüyü əzəmətli işlərin neçə-neçə əsrlərlə yaşayacaq vüsəti qədər uzunömürlüdür.

1995-ci ildə Mehriban xanım Azərbaycan Mədəniyyətinin Dostları Fondunu (AMDF) təsis edib və özü də ona rəhbərliyə başlayıb. İlk növbədə bu fondun konseptual və fundamental fəaliyyət proqramı müəyyənləşdirilib. Fondun xəttilə keçirilən festivallar, sərgilər, konsertlər, müxtəlif mədəniyyət tədbirləri Bakıdan pərvaz taparaq Amerikada, Fransada, Almaniyada, İngiltərədə, Yaponiyada, dünyanın daha neçə ölkəsində millətimizin qüdrətini, onun qədim və zəngin irsinin zənginliyini təcəssüm etdirib. Bircə faktı xatırladım ki, Fond dünya şöhrətli vokal ustaları Rəşid Behbudovun, Fidan və Xuraman Qasımova bacılarının sənət incilərini dinləyicilərə ərməğan edib. Müslüm Maqomayevin ifasında romanslardan, opera ariyalarından, kinofilmlərdə oxuduğu mahnılardan ibarət 5 diskli albomu buraxılıb.

Bir il sonra Mehriban xanım Fondda "Azərbaycan - İrs" jurnalını təsis edib və bu dərgi Azərbaycan, rus, ingilis dillərində nəşr olunur. Burada milli mənəvi dəyərlərimizlə bağlı ən müxtəlif mövzularda elmi araşdırmalar, inkarolunmaz tarixi faktlar dərc edilir. Azərbaycan tarixinin qaranlıq dövrlərinə səriştəli alimlərin tədqiqatları və elmi araşdırmaları ilə zəka nuru saçılır.

Mehriban xanım Əliyeva 2002-ci ildə Azərbaycan Gimnastika Federasiyasının prezidenti seçilib. Seçilən gündən o, bu istiqamətdə səylə fəaliyyətə başlayaraq zərifliyi, gözəlliyi, füsunkarlığı formalaşdıran bu idmanın kütləviliyi üçün xeyli iş görüb. Mehriban xanımın inadkarlığının və qətiyyətlə, özünə inamla apardığı mübarizənin nəticəsində gimnastika üzrə 2003 və 2004-cü illərdə Dünya kuboku yarışları və 2005-ci ildə Dünya çempionatı Azərbaycanda keçirilib.

Mehriban xanım Əliyeva 2004-cı il avqust ayının 13-də YUNESKO-nun (Birləşmiş Millətlər Təşkilatının Təhsil, Elm və Mədəniyyət Məsələləri Təşkilatı. Təşkilat 16 noyabr 1945-ci ildə yaranıb) xoşməramlı səfiri seçilib. Rəsmi təqdimat isə sentaybr ayının 9-da olub. Bu ali rütbəyə ənənəvi musiqinin, ədəbiyyatın, poeziyanın inkişafına verdiyi töhfələrə, musiqi təhsili və dünya mədəniyyətlərinin mübadiləsi sahəsindəki xidmətlərinə və YUNESKO-nun ideyalarına göstərdiyi sadiqliyinə görə seçilib. Bəli, məhz seçilib!

Bu arada Mehriban xanım xeyriyyəçilik fəaliyyətini daha da genişləndirib. Rusiya və Azərbaycan xalqları arasında dostluq körpülərinin möhkəmləndirilməsində, sarsılan dayaqların bərpasında və yeni faydalı əlaqələrin qurulmasında möhtəşəm işlər görüb. Bu xidmətlərinə görə Mehriban xanım Əliyeva Rusiya Beynəlxalq Xeyriyyə Fondunun "Yaqut Xaç" ordeni ilə təltiflənib.

2006-cı il noyabr ayının 24-də sivilizasiyalararası dialoq daxil olmaqla, müxtəlif sahələrdəki geniş fəaliyyətinə, kimsəsiz uşaqlara diqqətinə, onların təhsilinə qayğısına, islam aləmində görülən xeyirxah işlərə dəstəyinə görə İSESKO-nun (Təhsil, Elm və Mədəniyyət Üzrə İslam Təşkilatı) xoşməramlı səfiri adına layiq görülüb. Bu gün Mehriban xanım Əliyevanın adı müsəlman ölkələrində böyük ehtiramla çəkilir. Onun Pakistanda inşa etdirdiyi təhsil ocağı yüzlərlə uşağın parlaq və xoşbəxt gələcəyinin elmi təməli olacaq.

Bunlar rəsmi tarixlərdir və sırf gerçək reallığın konkret zamanını təcəssüm etdirir. Lakin bura qədər Mehriban xanımın gördüyü möhtəşəm işlər olub ki, iki nüfuzlu beynəlxalq qurumun xoşməramlı səfirləri sırasında azərbaycanlı xanım da şərəfli yer tutur. Onlardan görülmüş və görülməkdə davam edən bir neçəsini xatırlatmaq istəyirəm.

Mehriban xanım Əliyevanın böyük səyləri, ardıcıl və məqsədyönlü, inamlı və qətiyyətli mübarizəsi nəticəsində YUNESKO "Bəşəriyyətin şifahi və qeyri-maddi irsinin şah əsərləri" siyahısına Azərbaycan muğamı da daxil edilib. Xalqımızın milli sərvəti olan Azərbaycan muğamı, onun tarixi və bədii-estetik dəyərləri, poetika səciyyələri dünya səviyyəsində qəbul olunub.

Məhz Mehriban xanımın işgüzarlığının beynəlxalq səviyyədə dəyərləndirilməsinə görə YUNESKO-nun Baş direktoru Kioşiro Matsuura iki dəfə Bakıda olub. O, Beynəlxalq Muğam Evinin təməlqoyma mərasimində iştirak edib. Elə buradaca böyük qürur hissilə deyim ki, belə bir möhtəşəm mərkəz dünyada ilk dəfə Azərbaycanda yaradılır. Əminəm ki, bu məkan yaxın gələcəkdə dünyanın muğam mərkəzinə çevriləcək.

Mehriban xanım Əliyevanın təşəbbüsü, təşkilatçılığı və konseptual proqramı sayəsində 2004-cü il may ayının 10-da Heydər Əliyev Fondu yaradılıb. Heydər Əliyev Fondu dahi öndərin siyasi irsini və əqidəsini tədqiq və təqdim edən mərkəzdir. Eyni zamanda milli mədəni irsimizin dünənini, bugününü və sabahını ləyaqətlə qorumaq proqramının daşıyıcısıdır.

Fond ölkədə təhsilin, səhiyyənin, elm və mədəniyyətin, idmanın inkişafına xüsusi diqqət yetirir.

Fond "Azərbaycan: sivilizasiyalararası dialoqun keçmişi və bugünü", "Orta əsr əlyazmalarında tibb və əczaçılıq" mövzularında beynəlxalq konfranslar keçirib.

Fondun "Hərəmiz bir ağac əkək", "Diabetli uşaqlara ən yüksək qayğı", "Azərbaycan muğamları" layihələri inamla həyata keçirilir.
Fondun yüksək poliqrafik keyfiyyətlə və elmi əsaslarla buraxdığı "Qarabağ xanəndələri" toplusu dünyanın müxtəlif ölkə nümayəndələrinə hədiyyə verilir. Bunun mədəni irsimizin təbliği ilə yanaşı, son dərəcə dəyərli siyasi əhəmiyyəti də var. Təkcə elə bu faktla Qarabağın Azərbaycana bağlılığını şərəflə dünyaya car çəkmək olur.

Mehriban xanımın rəhbərlik etdiyi Heydər Əliyev Fondunun xəttilə respublikamızın bütün bölgələrində yeni-yeni məktəb binaları tikilib. Onlar lazımi müasir texniki avadanlıqlarla təmin olunub. Təzə inşaat işləri davam etməkdədir.

Mehriban xanım respublikamızdakı müxtəlif xarakterli, müxtəlif fəaliyyət yönümlü internat məktəblərinin hamısında olub. Hər yerdə Fondun "Uşaq evləri və internat məktəblərinin inkişafı" proqramı istiqamətində dəyərli işlər görüb və görməkdə davam edir.

Fond "Talassemiya", "Yeniləşən Azərbaycana yeni məktəb" mövzularında müntəzəm "dəyirmi masa"lar keçirir.

Fondun xəttilə inşa olunan neçə-neçə yeni məktəbin tikintisində və açılışında Mehriban xanım özü iştirak edib.

Uşaq evlərində və internatlarda keçirilən müxtəlif bayramlarda uşaqlarla birlikdə olub.

Bu görüşlərdə bələkdəki körpəni beşiyindən götürüb ülfətli səmimiyyətlə bağrına basır. Yenicə ayaq açan uşağa nəvazişlə tumar çəkir. Dili təzə-təzə söz tutan şirin-şəkər balanı mehribanlıqla dindirir. Bu uşaqların gözlərində parlayan sevinc Mehriban xanımın çöhrəsinə xüsusi yaraşıq verir. Bu fərəh, bu səmimiyyət, bu qayğıkeşlik, bu munislik uşaqlara dünyalar qədər sevinc bəxş edir.

Mehriban xanım dünyanın ən ali və müxtəlif xarakterli məclislərində çıxışlar edir. Onun çıxışları mövzunun əhatəliliyi, fəlsəfi dərinliyi, fikir mükəmməlliyi, dilinin şirinliyi, lətafəti və poetik vüsəti ilə heyranlıq doğurur. Bu baxımdan mən Mehriban xanımın Qətər dövlətində YUNESKO və Qətərin Təhsil Fondu tərəfindən keçirilən "Ərəb dövlətlərində savadlılıq: tərəfdaşlığın qorunması və yeni yanaşmaların təşviqi" regional konfransında (12-13 mart 2007), "Mədəniyyətlərarası dialoqda qadınların rolunun genişləndirilməsi" mövzusunda Beynəlxalq konfransın Bakı forumunda (18 iyun 2008) etdiyi çıxışlarını xüsusilə dəyərləndirmək istərdim.

Mehriban xanım Əliyeva incəsənəti, o cümlədən təsviri sənəti təkcə sevməklə və təbliğ etməklə kifayətlənmir. Həm milli, həm də dünya təsviri sənətinin ənənələrini, çağdaş yaradıcılıq prosesinin poetika göstəricilərini, mövcud estetik prinsiplərini dərindən-dərinə mənimsəyib. Elə bu il iyun ayının 9-da Finlandiyanın paytaxtı Helsinki şəhərindəki İncəsənət Muzeyini həmin ölkənin baş xanımı Renti Arayari ilə gəzdikdən sonra Mehriban xanım çıxış etdi. Qısa müddətli seyrdən sonra onun fin təsviri sənəti barədəki fikirlərinin dəqiqliyi və elmi-nəzəri əsasları nə qədər sevindirici idisə, bir o qədər də qürur və fəxarət doğururdu.

Mehriban xanım Əliyevanın xeyriyyəçilik fəaliyyətinin və uşaqlara səmimi münasibətinin möhtəşəmliyini onun ürək genişliyi tənzimləyir.

Bu ilin may ayında Parisdə YUNESKO-nun qərargahında "Azərbaycanın xoşməramlı mələkləri" adlı konsert keçirilib. Bu, adi konsert deyildi. Çağdaş Azərbaycanın daha xoşbəxt sabaha inamlı çağırışı kimi səsləndi.

Mehriban xanım Əliyevanın xarakterinin bütövlüyünü və zənginliyini ümumiləşdirmək üçün onun gördüyü əzəmətli işlərin çox qısa siyahısı da kifayətdir. Fransız bəstəkarı və dirijoru Şarl Quno (1818-1893) yazıb: "Bizi özümüzdə saxladığımızdan daha çox başqasına verdiyimiz zənginləşdirir". Mehriban xanımın milli irsimizin təbliğinə sərf etdiyi əmək, çağdaş sənətkarlarımıza göstərdiyi diqqət və qayğı, uşaqlara, xüsusən kimsəsiz və fiziki cəhətdən qüsurlu balalara çatdırdığı sevinc payı onun mənəviyyatının zənginliyindən soraq verir.

"Mənəviyyatın əsası ləyaqətlə düşünməkdir". Bu fəlsəfi qənaət fransız riyaziyyatçısı və filosofu Blez Paskalın (1623-1662) müdrik fikirlərindən biridir. Mehriban xanım millətinin mədəni irsinin təbliği naminə, uşaqların parlaq sabahları naminə, Azərbaycan həqiqətlərinin dünyaya hünərvərliklə çatdırılması naminə ləyaqətlə düşünməyi bacarır. Bacardığını inam və qətiyyətlə reallaşdırır. O, bütün işlərində iltifatlı və nəzakətli, sadədil və müdrikdir.

Qədim yunan və Çin filosoflarından üzü bəri müxtəlif xalqlarda işlənən belə bir müdrik kəlam var: "Həqiqətən xeyirxah olmaq üçün xeyirxahlıqdan bir az artıq xeyirxah olmaq lazımdır". Xeyirxahlıq və şahanəlik, lütfkarlıq və nəciblik, iltifat və nəzakət Mehriban xanımın qəlbində ülvi duyğularla yoğrulub və onun nurani çöhrəsində, xalq üçün gördüyü möhtəşəm əməllərində parlaqlıqla cilvələnib.

Eramızdan əvvəl yaşamış Çin filosof-mütəfəkkiri Konfutsi (551-479) söyləyib: "Kamil adam hər şeyi özündə, cılızlar isə başqasında axtarır". Zərif və incə görkəmə, geniş və saf duyğulu qəlbə malik Mehriban xanımın nəhəng-nəhəng işlərə inamla çiyin verməsinin kökündə onun kamilliyi durur. O, gücü, qüdrəti, istək və amalı uğrunda çarpışmağı özündə görməyi heyrətamiz cəsarətlə bacarır.

Sovet fiziki Leonid Mandelştamın (1879-1944) çox maraqlı bir kəlamı var: "Sözdə yumşaqlıq, hərəkətdə qətiyyət". Mehriban xanım danışığında nə qədər lətafətlidirsə, fikrinin izharı nə qədər aydındırsa, dinləyənləri irəli sürdüyü ideyaya inandırmaqda və görəcəyi işin reallaşmasında bir o qədər qətiyyətlidir. Mehriban xanımın cəsurluğu təfəkkür dərinliyinə, cəsarəti hünərvər zirəkliyə söykənir.

Holland rəssamı, postimpressionizmin görkəmli nümayəndəsi Vinsent Van Qoq (1853-1897) özünün adamlara məhəbbətini belə ifadə edib: "İnsanları sevməkdən nəcib heç nə yoxdur". Mehriban xanımın gördüyü işlərin ruhuna, canına, həyata keçirdiyi proqram və layihələrin mahiyyətinə onun insansevərliyinin munisliyi və həyatpərvərliyinin lətafəti hopub.

Alman filosofu Fridrix Engelsin (1820-1895) fəlsəfi düşüncələrindən bir yarpaq: "İradə azadlığı, əslində, işi bilməklə qərar qəbul etməkdir". Mehriban xanım üçün iradə azadlığı əzəli mənəvi ehtiyacdır. O, bu azadlığa zəngin dünyagörüşü, elmi təfəkkürü və nəzəri hazırlığı təcrübi reallığa çevirmək bacarığı ilə yiyələnib.

Fars şairi Sədinin (XIII əsr) fikrinə üz tuturam: "Əgər sən özgə kədərinə soyuqqanlısansa, onda sənin insan adını daşımağa haqqın yoxdur". Mehriban xanım müxtəlif bioloji qüsurları olan yüzlərlə uşağın qəlbində həyat eşqi coşdurub, onların ən müxtəlif problemlərini məharətlə həll edib. Mehriban xanımın kimsəsiz uşaqlara münasibətində isti ana nəvazişi duyulur, dupduru gözlərində məhəbbət şəfqəti parlayır, gülər üzündə mehribanlıq sayrışır. Məsum uşaqlarla mehribanlıqla danışıqları büllur kimi şəffaf laylaya bənzəyir.

Hind yazıçı-filosofu, Nobel mükafatı laureatı Rabindranat Taqorun kəlamına diqqət yetirək. "Həyat bizə müftə verilir, biz borcumuzu ödəyəndə ona ləyaqət qazanırıq". Mehriban xanım qısa zaman kəsiyində yüz illik bir insan ömrünə də sığmayan xeyirxahlıq və xeyriyyəçilik işləri görüb. Deməli, o, insani borcunu ehtiramla və ləyaqətlə ödəməklə daha böyük ucalıq qazanıb.

Yunan filosofu Kleobul (e.ə. VII-VI əsrlər) belə söyləyib: "Evdən çıxanda soruş: - niyə çıxıram? Qayıdanda soruş: - nə ilə qayıdıram?". Mehriban xanım hər dəfə Gəncəyə, Goranboya, Yevlaxa, Ağdaşa, Şamaxıya, Göyçaya, Astaraya, LənkəranaE, Suraxanıya, Şüvəlana, Sabunçuya, Türkana, Buzovnaya, MərdəkanaE xeyirxahlıq səfərlərindən evə dönəndə bir dünya uşaq və məktəbli sevinci ilə qayıdır. Evdən nə üçün çıxdığını dəqiq müəyyənləşdirən Mehriban xanımın qayıdışının insanlara töhfə çəkisi qat-qat ağır olur.

Qədim Romada quş dili bilən kahinlər (avqurlar) quşların uçuşu ilə müəyyən hadisələri əvvəlcədən soraq veriblər. Tarixin əbədiyyət yaddaşında belə bir müdrik kəlam var: keçmişə əsaslanıb gələcəyi görmək. Mehriban xanımın qənaətinə görə, yaddaş insanlara xeyirxah əməllərinə görə verilib. Mədəni-mənəvi irsimizin qorunması yolunda cəfakeşlik edən Mehriban xanımda keçmişi bugünün gözü ilə görmək qüdrəti var. Xalqımızın zəngin və dolğun tarixi yaddaşı onun çağdaş mənəvi-əxlaqi dəyərlərini də formalaşdırıb. Mədəniyyət yaddaşının geniş kütlə arasında mənəvi-əxlaqi tərbiyəyə çevrilməsində Mehriban xanımın xidmətləri danılmazdır. Məncə, bunun üçün "Muğam - 2007" müsabiqəsini yada salmaq kifayətdir.

Belçika yazıçısı, Nobel mükafatı laureatı Moris Meterlinq (1862 - 1949) özünün məşhur "Göy quş" əsərində belə bir ifadə işlədib: "Yad olunub xatırlananlar sanki ölməmişlər". Mehriban xanım Əliyeva Xoş məramlı səfir kimi Üzeyir bəy Hacıbəyovun, Qara Qarayevin, Səttar Bəhlulzadənin və neçə-neçə Azərbaycan dahisinin YUNESKO səviyyəsində tədbirlərinin keçirilməsinə nail olub. Cabbar Qaryağdıoğlunun, İslam Abdullayevin, Xan Şuşinskinin, Seyid ŞuşinskininE sənət inciləri yeni texnoloji vasitələrlə milyonlarla dünya dinləyicisinə çatdırılıb. Belə bir xeyirxahlıq, folklorun, ifaçılıq sənətinin və xalq sənətkarlığının qorunması istiqamətindəki fundamental nailiyyətləri Mehriban xanımın özünün ömrünə əbədiyyət nəğməsi oxuyur.

Rus yazıçı və filosofu Aleksandr Gertsenin (1812-1870) şairanə frazası yada düşür. "Çiçək bitkinin məqsədi və onun həyatının mənasıdır". Rabindranat Taqor isə deyib ki, "yarpaq sevəndə çiçək olur, çiçək sevəndə meyvə". Mehriban xanımın xeyirxah əməllərinin çiçəklənməsi onun həyatının mənasını daha da füsunkarlaşdırır. Mehriban xanımın bugünkü fidan balalara məhəbbəti nə qədər çiçək açacaqsa, gələcəkdə yetkin insanlar kimi yetişənlərin timsalında bir o qədər barlı-bəhərli olacaq. Elə bu kimi mənəvi keyfiyyətlərinə görə də Mehriban xanım Əliyeva "Qızıl ürək" beynəlxalq mükafatına layiq görülüb (may 2007).

Ana, uşaq və ailə sağlamlığının qorunmasında və möhkəmlənməsində gördüyü müstəsna xidmətlərə görə Dünya Səhiyyə Təşkilatının xüsusi mükafatı ilə təltiflənib (29 yanvar 2007). Xalqın millət vəkili seçilib.

Yazımın sonuna yaxın Mehriban xanım Əliyevanın özündən sitat vermək istəyirəm. "Həyatda hər bir kəsin yerini və taleyini tarix müəyyənləşdirir. Odur ki, nə böyük, nə də kiçik rollar olmur. Öz həyat kitabını yazmağa ancaq sənin şəxsi, dərk edilmiş məsuliyyətin imkan verir. Bu kitabda hər bir kəs özünü şəxsi həyatının və dünyanın qurub-yaradıcısı, yaxud dağıdıcısı kimi təcəssüm etdirir.

Kimsənsə elə də olmalısan. Bax, budur bizim həyatımız!"
Mehriban xanımın yüksək estetik zövqü var. Bu zövq onun layihə və proqramlarında özünün poetik təsdiqini tapır.

Mehriban xanımda sərrast düşünmək və gəldiyi qənaəti əməl azadlığının möhtəşəmliyi ilə reallaşdırmaq qüdrəti var.

Mehriban xanımın azad ideal məramları fövqəlbəşər dəyərləri ehtiva edən vüsətlə həqiqətə çevrilir.

Mehriban xanımın həyatdakı yerini artıq tarix müəyyənləşdirib. Ölkəmizin Baş xanımıı öz həyat kitabını xalqına məhəbbətlə və gördüyü əzəmətli quruculuq işləri, xeyriyyəçilik əməlləri sayəsində inam və qətiyyətlə yazır.

Azərbaycan.- 2008.- 3 oktyabr.- S. 3.