Respublikada ilk “Kitab-Bilik” festivalı keçirilmişdir

AzərTAc xəbər verir ki, oktyabrın 6-da Dövlət Kukla Teatrının qarşısında Firudin bəy Köçərli adına Kitabxananın təşəbbüsü ilə keçirilən ilk "Kitab-Bilik" festivalının təntənəli açılışı olmuşdur. Mədəniyyət və turizm nazirinin müavini Sevda Məmmədəliyeva hikmət və bilik xəzinəsi olan kitabın əhəmiyyətindən danışmış, gənc nəslin inkişafında mütaliənin böyük rolu olduğunu vurğulamışdır.

F.Köçərli adına Respublika Uşaq Kitabxanasının direktoru F.Quliyeva gənc nəslin tərbiyə olunmasında kitabın müstəsna, səmərəli və fəal rolu olduğunu, bu istiqamətdə kitabxananın əhəmiyyətli tədbirlər gördüyünü qeyd etmişdir. Bildirmişdir ki, festival çərçivəsində "Məktəb proqramına kömək", "Nağıllar aləmində", "Sənin maraq dünyan", "Çox oxuyan çox bilər", "Kitabxanalar informasiya cəmiyyətinin beynidir" və s. mövzularda kitab sərgiləri təşkil ediləcəkdir. Eyni zamanda, 1 nömrəli uşaq evində "Mənim dünyam" adlı rəsm və əl işləri müsabiqəsi, İncəsənət Gimnaziyasında Ramiz Əzizbəyli və başqa kinoaktyorlarla görüşlər, viktorinalar və digər tədbirlər nəzərdə tutulmuşdur.

"Kitab-Bilik" festivalında Dövlət Uşaq Filarmoniyası, Gənc Tamaşaçılar Teatrı, Bülbül adına orta ixtisas musiqi məktəbi, Oqtay Zülfüqarovun "Aysel" qrupu, S.Vurğun adına Rus Dram Teatrı, Dövlət Musiqili Komediya Teatrı, Dövlət Kukla Teatrı, T.İsmayılov adına Uşaq və Gənclər Yaradıcılıq Sarayının kollektivləri müxtəlif maraqlı səhnəciklər, musiqi və rəqs nömrələri ifa etmişlər. Rəsm nümunələri nümayiş olunmuşdur. Uşaqların ifasında uşaq yazıçı və şairlərinin əsərləri səsləndirilmişdir.

Festivalda Bakı məktəbliləri, bağça müəssisələrinin uşaqları, mədəniyyət müəssisələrinin kollektivləri, habelə ictimaiyyət nümayəndələri iştirak emişlər.

"Kitab-Bilik" festivalında müxtəlif mövzularda kitab sərgiləri, maraqlı viktorinalar, müsabiqələr keçirilmiş, qaliblərə hədiyyələr təqdim olunmuşdur.

Festival oktyabrın 10-dək davam edəcəkdir.

Azərbaycan.- 2008.- 7 oktyabr.- S. 4.