Qala xiyabanı tamamilə yenidən qurulmuşdur

Oktyabrın 8-də Prezident İlham Əliyev Lənkəran şəhərində tamamilə yenidən qurulmuş Qala xiyabanı ilə tanış olmuşdur.

Dövlətimizin başçısı və xanımı xiyabanı gəzdilər. Ətrafdakı küçələr də abadlaşdırılaraq müasir görkəmə salınmışdır. Suda fırlanan qlobuslar buraya xüsusi yaraşıq verir. Fəvvarələrin quraşdırıldığı xiyabanda Azərbaycanın Milli Qəhrəmanı Əsgər Əliyev adına dostluq parkı da salınmışdır. Ümumi sahəsi 1,6 hektardan çox olan parkda ölkəmizin bütün iqtisadi zonalarının göstəricilərini, eləcə də təbiətini, coğrafiyasını əks etdirən guşələr yaradılmışdır. Xiyabanda hər bölgə üzrə milli memarlıq abidələrindən ibarət maket də nümayiş etdirilir. Bu, təkcə lənkəranlıların deyil, həm də şəhərə gələn qonaqların Azərbaycan haqqında geniş məlumat almasına imkan yaradır.

Xiyabanda, əməkdar müəllim, Prezident təqaüdçüsü Mirhaşım Talışlı və Lənkəran Veteranlar Şurasının sədri Kamal Kələntərlinin heykəlləri də maraq doğurur.

Prezident İlham Əliyev xiyabanda və ətrafda görülmüş işləri yüksək qiymətləndirdi, açıq havada belə məlumat xarakterli guşənin yaradılmasının vətəndaşların və xarici qonaqların ölkəmizin regionları haqqında məlumat əldə etməsi baxımından faydalı olduğunu bildirdi.

Xalq qəzeti.- 2008.- 9 oktyabr.- S. 3.