Musabəyov
parkı fərqli görkəmdə
Orada
son tamamlama işləri görülür
Yasamal rayonunda yerləşən
keçmiş Musabəyov
parkının yaxın
günlərdə istifadəyə
verilməsi nəzərdə
tutulub. 2 hektara yaxın ərazini əhatə edən parkda son tamamlama
işləri görülür.
Yasamal rayon İcra Hakimiyyətindən
verilən məlumata görə, parkın Bakıda analoqu yoxdur. Belə fikir yürütməyə
əsas verən bir sıra amillər
var. Parkda inşa edilən quru hovuz Bakının
heç bir parkında yoxdur. Bu hovuzda bir
sıra yeniliklər var. Yeniliklərdən biri quraşdırılmış
böyük videomonitordur.
Monitor isə hovuzun və şəlalənin işləməsinə
köməklik edəcək.
Hovuz Şərq üslubunda inşa edilib və onun ərsəyə gəlməsində türk
mütəxəssislərinin böyük rolu olub. Yaşıllıq zolağının yaradılması
üçünsə İrandan
güllər və kollar gətirilib. Parkın qranit döşəməsi Hindistan
və Çin istehsalıdır. Parkın
əsas xüsusiyyətlərindən
biri də çilçırağın çoxluq
təşkil etməsidir.
Yerli istehsal olan oturacaqlar və zibil qutuları
da yeni modeldir.
Parkın rayonun daxili imkanları hesabına başa gəldiyi deyilsə də, xərclənən
vəsait barədə
konkret rəqəm bildirilməyib.
Xatırladaq
ki, park ötən ilin dekabrında təmirə dayanıb. 1978-ci ildə Musabəyovun
heykəlinin ucaldılması
ilə "Musabəyov
parkı" adını
alan bu park
ötən ilin dekabrına kimi paytaxt sakinlərini keçmiş kommunist,
1929 - 1931-ci illərdə o
dövrün parlament sədri olan Qəzənfər Musabəyovun
abidəsi ilə qarşılayardı.
Məhz dekabrda Musabəyovun heykəli dağıldı və parkda elə o vaxtdan təmirə
başlandı. Qeyd edək ki, bu
istirahət məkanı
təmirə qədər
uzun müddət idi baxımsız qalmışdı. Məhz
bu arqumentləri əsas gətirərək
Yasamal rayon İcra Hakimiyyəti
parkın yenidən qurulması layihəsini hazırladı. Layihədə
Musabəyovun heykəlinin
yeri boş qalmışdı. İstənilən
halda abidənin yerində heykəl olacaqdı. Amma hələliksə heykəlin
yerində Azərbaycan
bayrağı dalğalanır.
Həftə içi.- 2008.- 24 oktyabr.- S. 6.