Bakıda Azərbaycanın Rus İcması - 15 illik yol mövzusunda konfrans keçirilmişdir

Tədbirdə Azərbaycanın Rus İcması ilə Ümumrusiya Azərbaycanlıları Konqresi arasında əməkdaşlıq sazişi imzalanmışdır

Azərbaycanın Rus İcması (ARİ) özünün 15 illiyini qeyd edir.
Yubiley tədbirləri çərçivəsində sentyabrın 24-də Bakıdakı “Park İNN” mehmanxanasında “Azərbaycanın Rus İcması – 15 illik yol” mövzusunda konfrans keçirilmişdir.

Konfrans iştirakçıları əvvəlcə Fəxri Xiyabana gələrək, ulu öndər Heydər Əliyevin xatirəsini ehtiramla yad etmiş, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın məzarı üstünə də gül düzülmüşdür.

ARİ-nin sədri, Milli Məclisin deputatı Mixail Zabelin konfransı açaraq, Rusiya–Azərbaycan münasibətlərinin inkişafında Azərbaycanın Rus İcmasının və Rusiyanın Azərbaycan İcmasının xidmətlərini vurğulamışdır. Bildirilmişdir ki, Azərbaycan ilə Rusiya arasında bütün sahələrdə mövcud olan münasibətlər əməkdaşlığı hərtərəfli möhkəmləndirmək xəttinin alternativsiz olduğunu bir daha təsdiqləyir.

Bu, intensiv, etimada söykənən siyasi dialoq, artmaqda olan ticarət-iqtisadi əlaqələr xəttidir.

Prezidentin İcra Aparatının ictimai-siyasi məsələlər şöbəsinin müdiri Əli Həsənov Azərbaycan Prezidenti İlham Əliyevin konfrans iştirakçılarına təbrik məktubunu oxumuşdur (Təbrik məktubunun mətni qəzetin bugünkü nömrəsində dərc olunur).

Konfransda çıxış edən Azərbaycan Yazıçılar Birliyinin katibi, xalq yazıçısı Çingiz Abdullayev bildirmişdir ki, Azərbaycan və Rusiya xalqları arasında münasibətlərin çoxəsrlik tarixi vardır. Xalqlarımız yüzilliklər boyu sülh, dostluq, əməkdaşlıq şəraitində yaşamış, həmişə fəal, qarşılıqlı əlaqə saxlamışlar. Çox xoşdur ki, Azərbaycan müstəqilliyini bərpa etdikdən sonra Rusiya ilə münasibətlər dinamik, konstruktiv şəkildə inkişaf edir. Bu əlaqələr səmimi, mehriban qonşuluq və dostluq münasibətlərinə əsaslanır.

Rusiyanın ölkəmizdəki səfirinin müşaviri Oleq Kroxin demişdir ki, bu gün Rusiya ilə Azərbaycan arasında münasibətlər kifayət qədər çoxsahəlidir. Ölkələrimiz arasında gələcək münasibətlərin əsasını Azərbaycanın və Rusiyanın böyüyən və püxtələşən nəsilləri formalaşdıracaqlar. Hesab edirəm ki, Rusiya ilə Azərbaycan arasında bu istiqamətdə əməkdaşlıq başqa ölkələr üçün nümunə sayıla bilər.
Bakı və Xəzəryanı bölgənin Yeparxiyasının yepiskopu Aleksandr ata və digər çıxış edənlər də Azərbaycanda rus mədəniyyətinə, rus dilinə çox qayğıkeş münasibət bəsləndiyini bildirmişlər. Vurğulanmışdır ki, Cənubi Qafqazda ən böyük rus icması Azərbaycanda yaşayır və bu, ölkədə bərqərar edilən möhkəm sabitliyin, sürətli inkişaf və rifahın bəhrəsidir. Azərbaycanda yaşayan bütün millətlərin nümayəndələri özlərini rahat, sərbəst hiss edirlər. Millətlərarası sülh və konfessiyalararası dialoq Azərbaycanın uğurlu inkişafının əsasıdır.

Konfrans iştirakçıları adından Azərbaycan Prezidenti İlham Əliyevə və Rusiya Federasiyasının Prezidenti Dmitri Medvedevə müraciət qəbul olunmuşdur.

Konfrans çərçivəsində Ümumrusiya Azərbaycanlıları Konqresi (ÜAK) və Azərbaycanın Rus İcması əməkdaşlıq haqqında saziş imzalamışlar.

Sənədi Rusiyanın Azərbaycan İcması adından Ümumrusiya Azərbaycanlıları Konqresinin icraçı direktoru Eldar Quliyev və Azərbaycanın Rus İcmasının sədri, Milli Məclisin deputatı Mixail Zabelin imzalamışlar.

Əməkdaşlıq haqqında saziş ölkələrimiz arasında dostluq münasibətlərinin, qarşılıqlı anlaşma və etimad şəraitinin möhkəmləndirilməsində, Rusiyadakı Azərbaycan diasporunun və Azərbaycandakı rus diasporunun potensialından səmərəli istifadə etməyi nəzərdə tutur.

Sazişə görə, tərəflər mədəniyyət, maarifçilik və iqtisadi sahələrdə əlaqələrin möhkəmləndirilməsi, həmvətənlərin hüquqlarının müdafiəsi sahəsində birgə iş aparacaq, yaşadıqları ölkələrdə diasporların ictimai əlaqələrinin möhkəmləndirilməsinə qarşılıqlı dəstək verəcək, işlərin gedişi və planlar haqqında bir-birini müntəzəm məlumatlandıracaq, mədəniyyət, təhsil və s. istiqamətlərdə birgə tədbirlər həyata keçirəcəklər.
Bundan əlavə, konfransda ARİ fəalları mükafatlandırılmış, Azərbaycanın ali məktəblərinin rus bölməsinin ən fəal 22 tələbəsinə Moskva merinin təqaüdləri təqdim edilmişdir.

Konfransda Milli Məclis sədrinin müavini Valeh Ələsgərov və digər rəsmi şəxslər iştirak etmişlər.

Xalq qəzeti.- 2008.- 25 sentyabr.- S. 8.