Mükərrəmoğlu M.

Turizmin inkişafına diqqət artmaqdadır

1925-ci ildən müxtəlif adlar altında Cenevrədə fəaliyyət göstərən turizm təşkilatı, nəhayət, 1970-ci il sentyabr ayının 27-si Ümumdünya Turizm Təşkilatı kimi beynəlxalq miqyaslı bir struktur şəklində formalaşmışdır. 1979-cu ildə Baş Qərargahı Madrid şəhərinə köçən təşkilat 27 sentyabr- Ümumdünya Turizm Gününü təsis etmişdir. Bu gün artıq dünyanın 150-dən çox ölkəsində əsl turizm bayramı kimi qeyd olunur. 1996-cı ildən bu günədək ÜDTT-yə Fransa vətəndaşı olan Françesko Franciali rəhbərlik edir. O, öz fəaliyyəti dövründə bir neçə dəfə Bakıda olmuşdur və onu dünyanın ən gözəl şəhərlərindən biri hesab edir.

Turizm Günü münasibətilə Mədəniyyət və Turizm Nazirliyinin Turizm şöbəsi geniş tədbirlər planı işləyib hazırlamışdır. Dünən respublikanın ali təhsil ocaqlarında(BDU, Neft Akademiyası, İqtisad Universiteti və s.) təhsil alan I kurs tələbələri üçün təşkil etdiyi ekskursiyanın ilk ünvanı Hökumət evi oldu. Mədəniyyət və Turizm Nazirliyi tərəfindən hazırlanmış “siti-tur” avtobusları iki saat ərzində paytaxtımıza gələn qonaqları və bundan sonra burda hələ daha bir neçə il yaşayacaq xarici tələbələri qədim, amma gündən-günə yeniləşən və gözəlləşən Bakı ilə tanış etdi.

Bu gün isə Ümumdünya Turizm Gününə həsr olunmuş konfrans keçirilir. Konfransda Ümumdünya Turizm Təşkilatından dəvət olunmuş şəxslərin, yerli və beynəlxalq turizm şirkətlərinin nümayəndələri, media mənsubları və başqa qonaqlar iştirak etdilər. Konfransın gedişində beynəlxalq turizmlə, Azərbaycanda turizmin inkişafı ilə bağlı müxtəlif çıxışlar dinlənəcək. Tədbir turizmlə bağlı müxtəlif sahələrdə mükafatların, mehmanxana və mehmanxana tipli obyektlərə lisenziyaların təqdimatı və mükafatlandırma ilə bitəcəkdir.

Ümumdünya Turizm Günü paytaxtımızın qonaqları və sakinlərinin yaddaşında həm də muzeyləri ziyarət günü kimi də qalacaq. Bu gün Bakı şəhərində fəaliyyət göstərən bütün muzeylərdə “Açıq Qapı” günü elan olunmuşdur. Muzeylər tamaşaçılara ödənişsiz mədəni xidmət göstərirlər. Xatırlatmaq istərdik ki, bir müddət əvvəl mədəniyyət və turizm naziri Əbülfəs Qarayevin sərəncamına əsasən Bakının beş aparıcı muzeyi –Azərbaycan Dövlət İncəsənət Muzeyi, Azərbaycan Xalçası və Tətbiqi Sənəti Muzeyi, Azərbaycan Musiqi Mədəniyyəti Dövlət Muzeyi və Azərbaycan İstiqlal Muzeyi ekspozisiyaları və kütləvi şöbələrinin iş vaxtı 2008-ci il 1 noyabr tarixinədək saat 10.00-dan 19.00-dək, istirahət və bayram günləri isə saat 10-dan 20-dək uzadılmışdır. Bu ildən etibarən hər il sentyabrın 27-si Bakı muzeylərində “Açıq Qapı” ənənəsi davam etdiriləcək.

Xalq qəzeti.- 2008.- 27 sentyabr.- S. 15.