Qazaxda Dövlət Rəsm Qalereyası açılmışdır

Azərbaycan Prezidenti İlham Əliyev sentyabrın 24-də Qazax Dövlət Rəsm Qalereyasının açılışında iştirak etmişdir.
Burada Azərbaycan rəssamlarının 373 əsəri toplanmışdır. Rəsm qalereyasının əsası 1986-cı ildə qoyulsa da, binada yalnız bu il yenidənqurma işləri aparılmışdır. İndi o, şəhərin yaraşıqlı memarlıq nümunələrindən birinə çevrilmişdir.

Qalereya ilə tanışlıq zamanı dövlətimizin başçısına məlumat verildi ki, hazırda sərgi salonunda 62 rəsm əsəri nümayiş etdirilir. Onların bir qismi Rəssamlar İttifaqının hədiyyəsidir. Tanınmış yerli fırça ustaları Nəcməddin Hüseynovun və Alyoş Abdullayevin əsərləri qalereyanın qiymətli eksponatlarından sayılır. Azərbaycanın xalq rəssamı Toğrul Nərimanbəyovun əsərinin isə ekspozisiyada xüsusi yeri var. Qalereyada uşaq rəsm dərnəyi də fəaliyyət göstərir.

Bununla da Azərbaycan Prezidentinin Qazaxa səfəri başa çatdı.

Xalq qəzeti.- 2008.- 25 sentyabr.- S. 3.