"Bir nağıl söylə mənə"

Dünən Muzey Mərkəzində "Bir nağıl söylə mənə" adlı Azərbaycan milli cizgi filmləri toplusunun təqdimat mərasimi keçirildi.

Mədəniyyət və Turizm Nazirliyi ilə Heydər Əliyev Fondunun birgə hazırladıqları topluda 9 cizgi filmi yer alıb. Xatırladaq ki, bu il Azərbaycan animasiyasının 75 illik yubileyi də qeyd olunur. Elə söhbəti gedən tədbir də Azərbaycan animasiyasının 75 illiyi və yeni dərs ilinin başlanmasına həsr olunmuşdu. Tədbirdə "Mərhəmətin dadı" yeni cizgi filmi də mərasim iştirakçılarına təqdim olundu. Uşaq evləri, uşaq problemləri ilə məşğul olan dövlət və ictimai təşkilatların nümayəndələri də mərasimdə iştirak edirdi. Tədbiri Mədəniyyət və Turizm naziri Əbülfəs Qarayev açaraq, Azərbaycanın cizgi filmləri tarixinin böyük yol keçdiyini söylədi. Nazirin sözlərinə görə, ilk cizgi filmimiz hələ ötən əsrin 30-cu illərində çəkilib: "Bu gün uşaqlarımız milli cizgi filmlərimizə baxa bilmirlər. Onlardan bəziləri itdikləri üçün Azərbaycan Film Fondu vasitəsilə Rusiyada saxlanılan bir neçə cizgi filmimizi Azərbaycana gətirdik. Belə filmlər balacaların mənəviyyatını, tərbiyəsini milli ruhda formalaşdırmağa kömək edir. Toplu televiziyalara da təqdim olunacaq və belə layihələr gələcəkdə davam edəcək".

Mədəniyyət və Turizm Nazirliyinin kinematoqrafiya şöbəsinin əməkdaşı Almaz Sultanzadə çıxışında cizgi filmləri barədə ətraflı məlumat verməyə çalışdı. Bildirdi ki, topluya daxil edilən filmlərdən 1-i 2008-ci ildə, 8-i 70-80-ci illərdə çəkilib. Toplu regionlarda, xaricdə uşaq problemlərilə məşğul olan təşkilatlara da gödəriləcək.

Şərq.- 2008.- 18 sentyabr.- S. 14.