Mükərrəmoğlu M.

Dövlət Film Fondu yeni materiallarla zənginləşir

Müstəqillik qazandıqdan sonra Azərbaycanda milli-mənəvi sərvətlərin toplanması, saxlanması, gələcək nəsillərə çatdırılması istiqamətində ciddi işlər görülməyə başlandı. SSRİ tərkibində yaşadığımız dövrdə milli mədəniyyət nümunələrimiz müxtəlif muzey və fondlara səpələnmişdi. O cümlədən, filmlərimiz, sənət adamları haqqında materiallar da SSRİ-nin ayrı-ayrı şəhərlərində yerləşdirilmişdi.

Azərbaycan Dövlət Film Fondunun yaradılması həmin materialların ortaya çıxarılması və ölkəyə gətirilməsi işini xeyli sürətləndirdi. Bu gün həmin fonda müxtəlif ölkələrdən onlarla fılm və digər materiallar gətirilmişdir.

Bu yaxınlarda isə Gürcüstandakı şəxsi arxivlərdən birindən maestro Niyazi və Müslüm Maqomayev haqqında arxiv sənədləri və fotolar bu fonda təhvil verilmişdir. Fondun direktoru, əməkdar incəsənət xadimi, kinorejissor Cəmil Quliyevin verdiyi məlumata görə, həmin sənədlər artıq fondun müvafıq bölmələrində yerləşdirilmişdir. Bu yaxınlarda Böyük Britaniyadakı şəxsi arxivlərdən birindən məşhur aktyor Robert Rossun 1960-cı ildə Bakıda səfərdə olan zaman çəkdirdiyi fotolar Film Fonduna təqdim olunmuşdur. Məlumat üçün bildirək ki, R.Ross "Sirk", "Şirlər adası", "Boksçular" "Cəvahirlər adası" və digər fılmlərdə baş rolları ifa etmişdir.

Xaql qəzeti.- 2008.- 2 sentyabr.- S. 3.