Moldovanın milli bayramı şərəfinə

AzərTAc xəbər verir ki, sentyabrın 11-də Moldovanın Azərbaycandakı səfirliyi ölkəsinin milli bayramı - Müstəqillik günü münasibətilə "Hyatt Regency" mehmanxanasında rəsmi qəbul təşkil etmişdir.

Səfir İon Robu qonaqları salamlayaraq demişdir ki, Moldova və Azərbaycan dinamik inkişaf edir. Biz müstəqillik əldə etdiyimiz vaxt yaranmış iqtisadi böhranı geridə qoymuşuq, bu gün dövlətlərimizin uğurlu inkişafı ölkələrimizin yerləşdiyi regionda sabitliyin mühüm amilidir.

Diplomat Moldova ilə Azərbaycan arasında dostluq əlaqələrinin möhkəmlənməsində dövlətlərimizin başçılarının rolunu xüsusi vurğulamışdır. İ.Robu əminliklə bildirmişdir ki, Azərbaycan ilə Moldova arasındakı ənənəvi dostluq və əməkdaşlıq dövlətlərarası münasibətlərimizin möhkəm əsası olaraq bundan sonra da ikitərəfli əlaqələrimizin inkişafına və möhkəmlənməsinə təkan verəcək, xalqlarımızın mənafelərinə, onların tərəqqisinə xidmət edəcəkdir.

Milli Məclis sədrinin müavini Valeh Ələsgərov Azərbaycan Prezidenti İlham Əliyevin adından bayram münasibətilə Moldova xalqını təbrik edərək vurğulamışdır ki, Azərbaycan-Moldova əlaqələri möhkəm təməl üzərində qurulmuşdur, xalqlarımızın dostluğu çoxəsrlik tarixə malikdir.

Valeh Ələsgərov dost ölkələr olan Moldova ilə Azərbaycan arasında gündən-günə genişlənən əlaqələrdən məmnunluğunu bildirərək demişdir ki, dövlətlərimizin başçılarının qarşılıqlı səfərləri, yüksək səviyyəli görüşlər və danışıqlar ikitərəfli münasibətlərin yüksələn xətt üzrə inkişafına əlverişli zəmin yaradır.

Qəbulda Milli Məclisin deputatları, hökumət rəsmiləri, xarici ölkələrin Azərbaycanda akkreditə olunmuş səfirləri iştirak etmişlər.

Azərbaycan.- 2008.- 12 sentyabr.- S. 3.