TÜRKSOY Opera
Günləri: dəyərli ənənə bərpa edilir
Türk dünyasında güclü əsasa malik olan opera
sənəti TÜRKSOY Opera
günləri adı ilə on dəfə
sənətsevərlərlə görüşüb və
hər dəfə böyük maraqla qarşılanıb. Türkdilli
Ölkələrin Mədəniyyət
Nazirləri Daimi Şurasının qərarı
ilə beş illik fasilədən sonra bu ənənə
11-14 sentyabr 2008-ci il tarixində Mərsin və Girnədə yenidən operasevərlərin
görüşünə gələcək.
TÜRKSOY-a üzv ölkələrdən
23 sənətkarın iştirak
edəcəyi bu tədbir Türkiyə Mədəniyyət və
Turizm Nazirliyi, Şimali Kipr Türk Cümhuriyyəti Milli Təhsil və Mədəniyyət
Nazirliyinin birgə dəstəyi və təşkilatçılığı ilə keçiriləcək.
XI TÜRKSOY Opera günləri Türk və
Şərq opera sənətinin ilk nümunəsi "Leyli
və Məcnun"un 100 illiyinə həsr olunacaq. Opera
Günlərində Azərbaycandan Gülnaz İsmayılova,
Samir Cəfərov, Nəzakət Teymurova, Mənsum
İbrahimov, Elçin Həşimov, Elnur Əhmədov
iştirak edəcəklər.
Sentyabrın 11-də Mərsində, sentyabr14-də
Girnədə keçiriləcək konsertlərdə
TÜRKSOY-a üzv ölkələrin sənətkarları
digər xalqların milli operalarından da nümunələr
ifa edəcəklər. Azərbaycan və Türkmənistandan
gələn sənətkarlar
isə "Leyli və Məcnun" operasından ariyalar oxuyacaqlar. Bundan əlavə, konsertlər zamanı "Leyli və Məcnun" operasının 100 illiyinə
həsr olunmuş fotoqrafiya və afişalardan ibarət sərgi də təşkil ediləcək.
525-ci qəzet.- 2008.- 5 sentyabr.- S. 7.