Qadir T.

 

20 illik yaradıcılığa ən gözəl töhfə

 

Faiq Ağayev: Ölkə başçısına dəfələrlə minnətdaram ki, biz sənət adamlarının əməyinə belə yüksək dəyər verir, işimizi qiymətləndirir
Azərbaycan musiqi mədəniyyətinin inkişafındakı xidmətlərinə görə Xalq artisti adına layiq görülən əməkdar artist, sevilən müğənni Faiq Ağayevin sevincinin həddihüdudu yoxdur.

Özünü olduqca bəxtiyar hiss edən müğənni içindən keçən duyğuları dilə gətirəcək ifadələr tapmaqda çətinlik çəkir. "Çox xoşbəxtəm ki, 28 yaşımda Əməkdar artist adına layiq görülmüşəm. 36 yaşında da dövlət başçısının fərmanı ilə mənə Xalq artisti adı verildi. Mən zəngin bir mədəniyyətə malik olan millətin Xalq artisti olmağıma görə şərəf hissi duyuram özümü göyün yeddinci qatında hiss edirəm. Mən dövlət başçımıza öz adımdan eləcə , həmkarlarım adından təşəkkür edirəm. Öz növbəsində mənimlə bərabər mükafatlandırılan həmkarlarımı da təbrik edirəm. Təbii ki, mənim üçün məsuliyyət birə beş artdı. Amma bu heç o demək deyil ki, mən əvvəllər işimə məsuliyyətsiz yanaşmışam. Artıq bundan sonra çalışacağam ki, bu yüksək ada daima layiq olum. Bu xəbəri ilk olaraq eşidəndə daha çox ona görə xoşbəxt oldum ki, uğurumla hər kəsdən çox anamı sevindirə bildim. Bir oğul olaraq anamı sevindirə bildimsə, mənim üçün bundan dəyərli heç ola bilməz".

Son illər dövlət tərəfindən mədəniyyət sahəsinə və eləcə də, bu sahənin təmsilçilərinə ayrılan diqqət və qayğıdan söhbət açan müğənni aşağıdakıları söyləyib: "Onu deyə bilərəm ki, xalqımızın Ümummilli lideri Heydər Əliyevin Azərbaycanın mədəniyyəti və incəsənətinə, həmçinin, bu sahədə çalışan şəxslərə yönəltdiyi diqqət və qayğısı ulu öndərin siyasi kursunun layiqli davamçısı olan Prezident İlham Əliyev tərəfindən bu gün də davam etdirilməkdədir. Azərbaycan mədəniyyət işçiləri hər zaman dövlət tərəfindən, şəxsən prezident İlham Əliyev tərəfindən bu qayğını hiss edib. Mən ölkə başçısına dəfələrlə minnətdaram ki, biz sənət adamlarının əməyinə belə yüksək dəyər verir, işimizi qiymətləndirir".

Yaradıcılıq sahəsində planlarının böyük olduğunu deyən Xalq artistinin bu il səhnə fəaliyyətinin 20 ili tamam olur: "İnşallah ənənəyə uyğun olaraq dekabr ayının 10da Heydər Əliyev Sarayında möhtəşəm bir konsert nəzərdə tutulub. Bu konsertin ötənlərdən əsas fərqi ondan ibarət olacaq ki, artıq Faiq Ağayev pərəstişkarlarının qarşısında Xalq artisti olaraq çıxış edəcək. Ona görə konsertə daha da böyük əzmlə hazırlaşırıq. Konsertin repertuarında 14 yeni mahnı olacaq. Hazırda aranjemançılar nəzərdə tutulan mahnılar üzərində çalışırlar. Digər tərəfdən çalışacağam ki, bu ilin sonuna kimi tamaşaçılara ən azı iki yeni klip təqdim edim. Beləcə, qarşıda məni çox böyük işlər gözləyir".
Xalq artisti hesab edir ki, hər bir peşə nümayəndəsinin uğuru onun işinin qiymətləndirilməsidir: "Onun bir növ varlığı da əməyinə dəyər verilməsindədir. Əgər söhbət müğənnilərdən gedirsə, məsləhət görərdim ki, repertuarlarında daha da peşəkar məhsullara üstünlük versinlər. Yaradıcılıqlarında peşəkar məhsullara qədər çox yer ayırsalar, bir o qədər zirvələrə ucalacaqlar. Onların da belə fəxri adlara sahib olmalarını, həm xalqın sevgisinə layiq olmalarını arzu edirəm. İnsanlara boş sözlərinə görə deyil, əməlləri müqabilində qiymət verilir. Əsil sənət adamı sözsöhbətlə yox, əməli işilə özünü təsdiq edə bilər. Ortada olmadığı təqdirdə danışdıqlarının qiyməti, faydası olmur. Son olaraq, fürsətdən istifadə edib qarşıdan gələn mübarək Ramazan bayramı münasibətilə xalqımızı təbrik edir hər birimizə əməllərimizlə ucalmağı diləyirəm".

 

Yeni Azərbaycan.- 2008.- 20 sentyabr.- S. 12.