Zeynalova S.

Yaradıcı gənclərimizin uğuru

Avqustun 1-də Azərbaycandan 6 nəfərlik nümayəndə heyəti YUNESKO-nun Dünya Xalq Yaradıcılıq Təşkilatının (DXYT) Yaradıcı Gənclərin birinci Dünya Konqresində iştirak etmək üçün ABŞ-a yola düşdü.

Səfər proqramı konqresin baş tutacağı yer — Yuta ştatı, Solt Leyk Siti şəhəri ilə tanışlıqdan başladı.

5 avqust 2008-ci il nəinki bizim, bütünlüklə Azərbaycan üçün əlamətdar bir gün idi. Azərbaycan Kulinariya Assosiasiyasının prezidenti cənab Tahir Əmiraslanovun DXYT-nin rəhbərliyi ilə apardığı uzunmüddətli danışıqlar nəticəsində, nəhayət ki, 44 ölkə içərisində yeganə olaraq Azərbaycan Mədəniyyəti gününü keçirməyə nail olduq. Məkan Solt Leyk Siti şəhərinin kolleci idi.

6 nəfərlik hümayəndə heyəti, başda Tahir Əmiraslanov olmaqla, Aynurə Əmiraslanova, Ramil Abdaşov, Aygün Əliyeva, Minarə Quliyeva və bu sətirlərin müəllifi çox böyük məsuliyyət tələb edən bu işin öhdəsindən məharətlə gəlməyə çalışdıq. Xatırlatmaq yerinə düşərdi ki, bu nümayəndə heyəti üç sahə üzrə özünü layiqincə təmsil etdi: Azərbaycan milli mətbəxi, milli rəqs və rəssamlıq. Bizim birinci işimiz Azərbaycan mədəniyyəti ilə maraqlanan xarici millətlərin nümayəndələrinə əsrlərdən gəlmiş, hələ də dadını, ləzzətini itirməyən Azərbaycan milli mətbəxini nümayiş etdirmək oldu. Plovların şahı sayılan Şah plov hazırladıq. Onu da qeyd etmək yerinə düşərdi ki, 100 nəfərlik Şah plovunu qonaqlara, döşəmə plovu isə "Ağzımız dada gəlsin" misalını çəkərək özümüzə və evlərində qaldığımız ev sahiblərinə hazırladıq. Lakin Azərbaycan mətbəxinə olan güclü marağa görə hər iki aşı süfrəyə verməyə məcbur olduq. Digər yeməklərimiz — balıq sırdağı və toyuq ləvəngisini Aynurə Əmiraslanova böyük kütlə üçün yalnız özü hazırladı. Daha sonra dovğa, alma deserti və şərbətlər hazırlanıb süfrəyə verildi. Onu da qeyd edək ki, qrupun dörd üzvü tanınmış aşbaz Şahüseyn Kərimovun yanında bir müddət kurs keçmişdi.

Tədbirin kollecdə keçirilməsinə baxmayaraq, böyük bir zalda təşkil olunmuşdu. Burada dekorasiya qurarkən belə milliləşdirməyə çalışdıq. Azərbaycan və Amerika bayraqları ilə yanaşı, zala Azərbaycan Respublikası Prezidentinin portreti yerləşdirildi. Quba xalçası yerə döşəndi. Səhnənin sağ tərəfində Səkinə Zeynalovanın 10 əsəri — 7 miniatür, 1 yağlı boya və 2 əl işi olan qurama, sol tərəfdə isə Aygün Əliyevanın 3 qrafik və 1 qobelen əsəri nümayiş etdirildi.

Azərbaycan Mədəniyyəti gününə təşrif buyuranlar arasında təkcə yerli camaat deyil, o cümlədən konqresin üzvləri Filippindən, Avstriyadan, Tayvandan, Özbəkistandan və b. ölkələrdən gələn qonaqlarımız da vardı.

Azərbaycan Mədəniyyəti günündə ilk olaraq söz DXYT-nin prezidenti xanım Karmen Padillaya (Fiüppin) verildi. Daha sonra XYT-nin baş katibi əslən Avstriyadan olan Hans Holza çıxış etdi. Hər iki iştirakçı bugün barədə məruzə etdilər. Azərbaycan nümayəndə heyətinin başçısı cənab Tahir Əmiraslanov öz növbəsirıdə tədbir iştirakçılarına Azərbaycandan salamlarını yetirdi. Mətbəx mədəniyyətimiz, bu günümüz barədə qonaqlara məlumat verdi. Əsas çıxışlardan sonra hər kəs süfrə arxasına dəvət olundu. Yemək ərəfəsində qonaqlar milli musiqilərimizi dinləməklə yanaşı, 2 milli rəqsimizin də şahidi oldular. Bunlardan birincisi "Qara qız" rəqsi idi. İkinci rəqs isə "Yuxayayanlar" rəqsi idi, rəqsdə miili mətbəx elementlərindən istifadə olunur. Bu rəqs kulinariyaya aid ilk dünya rəqsi hesab olunur ki, bu rəqsin ideyasını da bir çox maraqli ideyaların müəllifi olan Tahir Əmiraslanov vermişdir. Bədii rəhbər isə Rasimə Əhmədovadır. Bu rəqsi milli geyimdə üç nəfər — Səkinə Zeynalova, Aygün Əliyeva və Minarə Quliyeva ifa etdilər.

Milli musiqilərimiz tamaşaçılar tərəfindən o qədər maraqla qarşılandı ki, hətta dili bir, dini bir olan özbək qardaşlarımız da bizə qoşularaq rəqs etdilər. Yəqin ki, yad bir ölkədə bunun necə sevindirici hal olduğunu siz də təsəvvür edirsiniz.

Tədbir müddətində qonaqlara Azərbaycan mədəniyyətini özündə əks etdirən kitablar, suvenirlər, broşürlər, əl işləri, armudu stəkan və s. hədiyyə edildi. Əsas tədbirdən sonra qonaqlar xoş təəssüratlarını bizlərlə bölüşdülər.

Yüksək səviyyədə təşkil olunmuş bu möhtəşəm tədbirin səhəri günü, yəni avqustun 6-sı YUNESKO-nun Dünya Xalq Yaradıcılıq Təşkilatı (DXYT) tərəfindən keçirilən Yaradıcı Gənclərin birinci Dünya Konqresi saat 10:00-da öz işinə başladı. İclası DXYT-nin sədri xanım Karmen Padilla açıq elan etdi. Sonra XYT-nin baş katibi Hans Holz (Avstriya), DXYT-nin ABŞ üzrə prezidenti Jeorj Frandsenə, xanım İveta Pirqova çıxış etdilər. Fasilədən sonra Polşa, Bolqarıstan, Mali, Amerika nümayəndə heyətləri çıxış etdilər. Çıxışların sonunda Özbəkistanın nümayəndə heyətinin üzvü "Amerikanın Səsi" studiyasının əməkdaşı cənab Davron Əzizov çıxış etdi. O da öz növbəsində Özbəkistan və YUNESKO arasındakı əlaqələr və əməkdaşlıq haqqında, həmçinin Özbəkistanın tarixi abidələri, memarlığı, tarixi şəxsiyyətləri, xüsusilə Türk dünyasının ən nüfuzlu sərkərdəsi Əmir Teymur haqqında məruzə ilə çıxış etdi və onun tutduğu ərazilərlə bağlı qısametrajlı film göstərildi. Çıxışların sonunda DXYT-nin prezidenti xanım Karmen Padilla rəsmi hissəni bağlı elan etdi.

Rəsmi hissədən sonra şəhərin digər məkanında Rəqs Festivalı və parad oldu. Biz də öz növbəmizdə milli geyimdə və bayrağımızla bu paraddan keçdik.

Konqresin üçüncü gününü azərbaycanlı heyət üçün ən uğurlu gün hesab etmək olar.

İclası yunanıstanlı Kristos Tentzerakis açıq elan etdi. ABŞ, Rusiya, Yunanıstan, Filippin, Seneqal, Latviya təmsilçilərinin çıxışından sonra ixtiyar Azərbaycan nümayəndə heyətinə verildi. İlk olaraq təmsilçimiz Minarə Quliyeva Azərbaycanın milli geyimlərini nümayiş etdirdi və kostyumlarla bağlı çıxış etdi. Xatırladaq ki, geyimləri nümayiş etdirənlər arasında öz qızlarımızla yanaşı, tədbir iştirakçıları da milli geyimlərimizə xüsusi görkəm verirdilər. Və bu da qonaqlarda xoş təəssürat yaratdı.

Növbəti çıxışı Aygün Əliyeva etdi. O da öz növbəsində Azərbaycanda qrafika sənətinin inkişafından bəhs etdi və nümunələr göstərdi.

A.Əliyevanın çıxışından sonra Səkinə Zeynalovanın miniatür və yağlı boya əsərləri, o cümlədən əl işi olan quramaları tədbir iştirakçıları tərəfindən böyük rəğbətlə qarşılandı.

Mühazirələri daha bir üzvümüz Ramil Abdaşov davam etdirdi. "Azərbaycanın monumental arxitekturası" mövzusunda məruzə ilə çıxış edən təmsilçimiz qısametrajlı film təqdim etdi. Bütün bunlar tədbir iştirakçılarında böyük marağa səbəb oldu və məruzə iştirakçılarına suallar verildi.

Azərbaycan nümayəndə heyəti bununla kifayətlənmədi. Digər bir zalda Azərbaycan Kulinariya Assosiasiyasının prezidenti Tahir Əmiraslanov "Qida, ayinlər və rəqs" mövzusunda çıxış etdi. Mətbəx yeniliklərindən, adət-ənənələrimizdən, təbii qida sərvətlərimizdən və mətbəxə aid yeganə "Yuxayayanlar" rəqsindən bəhs etdi.

Tədbirin sonunda bir sira layihələr irəli sürüldü. Azərbaycan nümayəndə heyətinin üzvü və heyətin tərcüməçisi Aynurə Əmiraslanova ölkəmizi layiqincə təmsil etdiyinə görə həm konqresdəki layihələrə koordinator, həm də yaradıcı gənclər komitəsinə üzv seçildi. ABŞ-ın mötəbər qəzetləri Azərbaycan nümayəndə heyəti haqqında şəkillərlə bərabər yazı verdi.

Konqresin yekununda Azərbaycan nümayəndə heyətinin hər biri yüksək səviyyədə çıxışına görə DXYT-nin sertifikatı ilə təltif olundu.

Minarə Quliyevanın milli görkəmli gəlincik əsəri DXYT-nin prezidenti xanım Karmen Padillaya, Səkinə Zeynalovanın bir miniatür əsəri DXYT-nin ofisinə qoymaq üçün baş katib Hans Holza təqdim edildi. S.Zeynalovanın əl işi olan qurama və Aygün Əliyevanın qrafik əsəri DXYT-nin ABŞ üzrə prezidenti Jeorj Frandsenə, o cümlədən Səkinə Zeynalovanın digər bir miniatür əsəri isə Yuta ştatının senatının eks-prezidenti cənab Hevin Borlova hədiyyə verildi.

Azərbaycan nümayəndə heyəti Yuta ştatından ayrılarkən, dünyanın bir çox ölkələrinin ölkəmiz haqqında böyük təəssürata, bilgiyə malik olduqlarının şahidi olduq. Bu nailiyyəti yalnız heyət olaraq bizim yox, o cümlədən ölkəmiz üçün böyük uğur hesab etmək olar. Ölkəmizi layiqincə təmsil etməyimiz üçün yaratdığı şəraitə görə Azərbaycan Respublikasının Mədəniyyət və Turizm Nazirliyinə, Gənclər və İdman Nazirliyinə, Azərbaycan Kulinariya Assosiasiyasının prezidenti cənab Tahir Əmiraslanova öz minnətdarlığımızı bildiririk.

Respublika.- 2008.- 11 sentyabr.- S. 6.