Fidan Hacıyeva: İncəsənətin istənilən növü ilə əsl peşəkarlar məşğul olmalıdırlar

Oktyabrın 6-da Kiyev Filarmoniyasının böyük salonunda Azərbaycanın əməkdar artisti, Beynəlxalq müsabiqə laureatı, Azərbaycan Dövlət Akademik Opera və Balet Teatrının solisti Fidan Hacıyevanın solo konserti olacaqdır. Onu fortepianoda əməkdar incəsənət xadimi Cavan Zeynallı müşayiət edəcəkdir. Müğənni özünün yeni layihəsi haqqında bu yaxınlarda AzərTAc-ın qonağı olarkən söhbət açmışdır.
Fidan xamın demişdir: "Konsertin təşkilatçısı Azərbaycan-Ukrayna Dostluğu Beynəlxalq Xeyriyyə Cəmiyyətidir. Biz maraqlı repertuar seçmişik. Bura Azərbaycan və əcnəbi xalq mahnıları, romanslar daxildir. Bu dəfə klassik əsərlərə az yer verilmişdir. Mahir musiqiçi Cavan Zeynallı və mənim müəllimim, Bakı Musiqi Akademiyasının professoru Hüseyn Əliyevlə birlikdə məxsusi olaraq bu proqram üçün gözəl caz kompozisiyaları, məşhur əsərlərə improvizasiyalar hazırlamışıq. Zənnimcə, maraqlı olacaqdır. Konsertə çoxlu qonaq, Ukraynadakı diasporumuzun nümayəndələri, səfirliyin əməkdaşları dəvət edilmişdir. Bakı tamaşaçısı isə proqramı ilin axırında qiymətləndirə biləcəkdir. Planlarımıza Cavan Zeynallı ilə birlikdə disk buraxmaq da daxildir".
Bu, müğənninin Ukraynaya artıq ikinci səfəridir. Öz nömrələrindən birini Azərbaycan poeziyasına həsr etmiş "Kiyevskaya Rus" ("Kiyev rus dövləti") ədəbi jurnalı bu münasibətlə təşkil etdiyi tədbirə Azərbaycanın yazıçı və şairlərini, aktyor və musiqiçilərini dəvət etmişdi. Fidan Hacıyeva Azərbaycan və xarici bəstəkarların əsərlərini ifa etmişdi. Onun çıxışı Ukrayna cəmiyyətində böyük əks-səda doğurmuş və nəticədə yeni dəvət gəlmişdir.

Müğənni opera səhnəsində yaradıcılıq planlarını da bizimlə bölüşdü: "Hazırda teatrda Coakkino Rossininin "Sevilya bərbəri" operasını tamaşaya qoymaq istəyirlər. Mən Rozinanın partiyasını ifa edəcəyəm. Burada məndən tamamilə başqa ifaçılıq texnikası tələb olunacaq. Əvvəllər yaratdığım bütün obrazlar - Azuçena, Karmen, Amneris dramatik obrazlardır. Rozina surətini yaratmaq üçün isə oynaqlıq, deyərdim ki, bir qədər xəyalpərəstlik tələb olunur. Tamaşa ilin axırınadək hazır olacaqdır".

Ümumiyyətlə, son illər müğənni üçün kifayət qədər səmərəli olmuşdur. O, solo konsertlər vermiş, bir çox opera tamaşalarında rollar almışdır. Bu yaxınlarda İsveçrədən gəlmiş çəkiliş qrupu Fidanı Azərbaycana həsr olunmuş filmə dəvət etmişdir. Azərbaycan mədəniyyətinin bir səhifəsindən söhbət açan "Opera müğənnisi ilə keçirilən gün" filmi sentyabrın axırında İsveçrə televiziyası ilə nümayiş etdiriləcəkdir. Həmsöhbətimiz "Belə sıx iş cədvəlini həyat yoldaşı və ana vəzifəsi ilə uyğunlaşdırmaq çətin deyilmi" sualına cavabında dedi: "Bilirsiniz, burada ən başlıcası düzgün plan tərtib edib, ona uyğun hərəkət etməkdir. Mən öz işlərimi əvvəlcədən planlaşdırdığım üçün onların öhdəsindən gəlirəm. Hər gün yeddinin yarısında durub səhər yeməyi hazırlayıram, uşaqları bağçaya yola salıram. Anam mənə çox kömək edir. Ona son dərəcə minnətdaram. Əlbəttə, uşaqlarımın mənim yolumu davam etdirəcəkləri barədə danışmaq tezdir, çünki hələ balacadırlar. Lakin artıq indidən oğlumun şəkil çəkməyə böyük həvəsi olduğunu hiss edirəm. Onun müxtəlif əşyalara öz baxışı var və zənnimcə, pis alınmır. Ümumiyyətlə, hesab edirəm ki, incəsənətin hər hansı növü ilə əsl peşəkarlar məşğul olmalıdırlar. Həm teatrda, həm də Musiqi Akademiyasında yaxşı səsi olan gənclərimizin sayı çoxdur. Fitri istedadı olan bu insanlar həm də zəhmətkeşdirlər. Əminəm ki, onların gözəl gələcəyi olacaqdır".

Azərbaycan.- 2008.- 28 sentyabr.- S. 19.