Əlizadə Ş.

Azərbaycan və Özbəkistan arasında əlaqələr qarşılıqlı faydalı əməkdaşlığa, qardaşlıq və dostluq prinsiplərinə əsaslanır

Azərbaycan və Özbəkistan münasibətlərinin çoxəsrlik tarixi var. Milli dəyərlərimizin, adət-ənənələrimizin, mədəniyyətlərimizin və dilimizin doğmalığı, yaxınlığı ölkələrimizin fəal əməkdaşlığında çox əhəmiyyətli rol oynayır. Özbəkistan prezidenti İslam Kərimovun Azərbaycana yüksək səviyyədə keçən rəsmi səfəri bunu bir daha təsdiqlədi. Dövlət başçılarının təkbətək və geniş tərkibdə görüşündə ikitərəfli əlaqələrin müxtəlif aspektləri, regional əməkdaşlıq və beynəlxalq vəziyyət barədə məsələlər müzakirə edildi, qarşılıqlı maraq doğuran fikir mübadiləsi aparıldı.

Özbəkistän prezidenti İslam Kərimovun ölkəmizə səfəri və aparılan danışıqlar bir daha sübut edir ki, ölkələrimiz arasında münasibətlər çox yüksək səviyyədədir. Dövlət başçılarının görüşündə qarşılıqlı maraq doğuran məsələlərin çox geniş dairəsi - ikitərəfli münasibətlər, regional siyasət, Qafqazda baş verən proseslər, bir sözlə, tərəfləri narahat edən və həlli tələb olunan məsələlər nəzərdən keçirildi. Tərəflərin ümumi qənaəti bu oldu ki, dialoq, işbirliyi və qarşılıqlı surətdə faydalı əməkdaşlığın potensialını artırmaq yolu ilə bir çox problemləri həll etmək mümkündür. Azərbaycan və Özbəkistan bu istiqamətdə səylərini davam etdirir. Hər iki dövlətin iqtisadi potensialı və müstəqilliklərini möhkəmləndirən müsbət proseslər, yürüdülən müstəqil siyasət də buna böyük zəmin yaradır.

Azərbaycan ilə Özbəkistan arasında dərin hörmət və etimadın təcəssümü Özbəkistanın xalq şairi, Azərbaycanın böyük oğlu, taleyin hökmü ilə Özbəkistan torpağında yazıb-yaradan Maqsud Şeyxzadənin məşhur rübailərində də öz əksini tapıb. Hər bir azərbaycanlı üçün xüsusilə xoşdur ki, Maqsud Şeyxzadə milli mədəniyyətin inkişafında xidmətlərinə görə Özbəkistanın ən yüksək mükafatlarına layiq görülüb. Bu il Daşkənddə bu böyük şairin 100 illik yubileyi təntənə ilə qeyd ediləcəkdir.

Bakıda görkəmli özbək şairi, mütəfəkkiri və dövlət xadimi Əlişir Nəvainin möhtəşəm abidəsinin açılışı və Azərbaycan paytaxtının mərkəzi küçələrindən birinə böyük özbək astronomu və maarifçisi Mirzə Uluqbəyin adının verilməsi ölkələrimizin mənəvi yaxınlığının, qardaşlıq və dostluğunun rəmzidir. Bütün bunlara böyük önəm verən, Daşkənd Dövlət Pedaqoji Universitetinin binası qarşısında Nizaminin abidəsinin ucaldığını xatırladan cənab İslam Kərimov özbək ədəbiyyatının banisinə Bakıda abidə açılması münasibətilə bildirdi: "Bu insan bizim də müasirimizdir. Ona görə ki, Nizaminin və Əlişir Nəvainin gördükləri işlər bu gün bizim həyatımızda yaşayır. Nizaminin və Əlişir Nəvainin irsi olmadan bizim bugünkü nəsil tərbiyə oluna bilməz. Onların irsi bizim güc aldığımız mənəviyyat və əxlaq xəzinəsidir".

Xatırladaq ki, əsrlər boyu sevinc və kədərini bir-birilə bölüşən xalqlarımız həyatın çətin sınaqlarına tab gətirmək üçün də həmişə bir-birinə dost əl uzadıb. Belə ki, 1930-cu illərdə kütləvi repressiyalar dövründə on minlərlə azərbaycanlının Özbəkistan torpağında sığınacaq tapması, özbəklərin onları öz doğmaları kimi açıq ürəklə qəbul etməsi, qarşılaması, evlərində sığınacaq verməsi hamımızın yadındadır. Hazırda Özbəkistanda 40 mindən çox azərbaycanlı yaşayır. Azərbaycanlılar ölkənin sosial-ictimai, iqtisadi həyatında və digər sahələrdə fəal iştirak edirlər. Təkcə son illərdə Azərbaycan diasporunun altı nümayəndəsi yüksək dövlət mükafatlarına layiq görülmüşdür. Bunlar ürəkaçan faktlardır və qürur hissi gətirən xəbərlərdir.

Özbəkistanın Dağlıq Qarabağ münaqişəsinin həlli məsələsində Azərbaycanı birmənalı şəkildə dəstəklədiyini bəyan edən prezident İslam Kərimov bildirib: "Bu problem, əlbəttə, dinc yolla və vurğulamaq istərdim ki, yalnız beynəlxalq normalara əməl edilməklə və Azərbaycanın ərazi bütövlüyünə və suverenliyinə hökmən riayət olunmaqla həll edilməlidir".

Dövlət başçısı İslam Kərimovun Azərbaycana rəsmi səfərini geniş işıqlandıran Özbəkistan qəzetləri bu səfərin nəticələrini yüksək qiymətləndirir, səfərin ikitərəfli əlaqələrin möhkəmləndirilməsində və dərinləşdirilməsində mühüm mərhələ olacağını qeyd edirlər.

Azərbaycan və Özbəkistan münasibətlərinin ruhu, məzmunu və imzalanan sənədlər göstərir ki, ölkələrimiz bir-birinə nə qədər yaxındır və bütün məsələlərdə mövqelərin üst-üstə düşməsi böyük uğurdur. Cənab İslam Kərimov əmindir ki, Azərbaycan və Özbəkistan bir-birinə nə qədər yaxın olsa, həm Azərbaycanın, həm də Özbəkistanın məsələlərini həll etmək bir o qədər asan olacaqdır.

Respublika.- 2008.- 18 sentyabr.- S. 4.