Azərbaycan rəqqasları "Eurovision-dance 2008" müsabiqəsində beşinci yeri tutmuşlar

Azərbaycan rəqqasları Eldar Cəfərov və Anna Sajina Şotlandiyanın Qlazqo şəhərində keçirilmiş "Eurovision-dance 2008" müsabiqəsində 5-ci yeri tutmuşlar. Müsabiqənin qalibi isə Polşa rəqs cütlüyü olmuşdur. İkinci yerə Rusiya, üçüncü yerə isə Ukrayna rəqqasları layiq görülmüşlər.

Hakimlər Azərbaycan cütlüyünə 4-cü yeri vermişdilər, lakin SMS-səsvermənin nəticələri onları bir pillə geri salmışdır.

Eldar Cəfərov və Anna Sajina "Odlar yurdu" adlı coşğun rəqs ifa etmişlər. Onların çıxışı Sara Braytman və Stiv Xarlinin ifasında Endryu Lloyd Veberin "Fantom opera" müziklinin musiqisi əsasında (aranjımançı Yaşar Baxış) qurulmuşdu.

Bi-Bi-Si-nin Şotlandiya bürosunun Avropa Yayım Şurasının dəstəyi ilə keçirdiyi "Eurovision-dance 2008" müsabiqəsində 14 ölkədən-Azərbaycan, Rusiya, Yunanıstan, Portuqaliya, Polşa, Ukrayna, Böyük Britaniya, Litva, Niderland, Finlandiya, İrlandiya, Danimarka, Avstriya və İsveçdən rəqs cütlükləri iştirak edirdilər. Builki yeni qaydalara əsasən, rəqs cütlüklərindən biri peşəkar olmamalı idi.

Respublika.- 2008.- 9 sentyabr.- S. 6.