Əli O.

Azərbaycan Eurovision Rəqs 2008 müsabiqəsinin sensasiyasi

Azarbaycan bu il sözün əsl mənasında Eurovision beynəlxalq müsabiqəsinin sensasiyalı iştirakçısına çevrildi. May ayında keçirilən mahnı müsabiqəsinin aparıcı debyutantı kimi finalda 8-ci yeri tutdu. Daha sonra ən yaxşı beşlik rəqs qrupuna daxil olaraq “Eurovision Rəqs- 2008” adlı müsabiqədə iştirakı ilə öz nailiyyətlərini Avropada müvəffəqiyətlə nümayiş etdirdi.

Dünən İctimai Televiziyada Şotlandiyanın Qlazqo şəhərində keçirilən “Eurovision Rəqs -2008” müsabiqəsində Azərbaycanı təmsil edən Eldar Cəfərov və Anna Sajinanın iştirakı ilə mətbuat konfransı keçirildi. Qeyd edək ki, Avropanın 20-dən artıq ölkəsində yayımlanan bu müsabiqədə Böyük Britaniya, Avstriya, İtaliya, Niderland, Portuqaliya kimi ölkələr iştirak etsələr də milyonlarla tamaşaçı auditoriyasını təşkil edən müsabiqədə ən yüksək qiymətləndirilən “Opera Kabusu” -Eldar və Annanın ifası ilə yadda qaldı.

Jurnalistlərin suallarına cavab verən cütlük bildirdi ki, müsabiqəyə hazırlıq əsaslı və geniş masştablı olub. Öz nömrələri üzərində hazırlığa cütlük ABŞ-da quruluşçu-xoreoqraf Bruno Kollinazanın rəhbərliyi ilə başlamışlar. Daha sonra cütlüyün hazırlıq prosesi İtaliyada çox məşhur olan Djeri Abrate və Katerina Ardzenton adlı rəqs məktəbində davam etmişdir.

Çıxışdan əvvəl məşq proseslərinə toxunan cütlük onu da əlavə etdi ki, hər prosesdə daha uğurlu nəticə əldə olunurdu. İştirakçılar bildirdilər ki, əldə olunan uğurların əsas səbəbi sadə olmayan dramatizmli rəqs nömrəsində zəngin keçmişli Azərbaycan mədəniyyəti, musiqisinin Avropa musiqisi ilə bir yerdə vəhdət təşkil etməsi olub.

Səsvermə prosesinə toxunan iştirakçılar bildirdilər ki, tamaşaçı və jürinin rəyinə görə Azərbaycan 4-cü yerdə olsa da sonradan Polşanın birincilik qazanması ölkəmizi bir pillə aşağı saldı. Lakin bunda heç də ölkə və müsabiqə iştirakçılarının təqsiri olmadığını, sadəcə ideal olmayan səsvermə sisteminin çatışmazlıqları ilə bağlı olduğunu söyləyən cütlük debüt olaraq iştirak etdikləri yarışmada əldə edilən nəticənin pis olmadığını vurğuladılar.

Diqqətdən yayınmayan bir məsələ isə dörd illik romantik münasibətə məhz bu müsabiqədə son qoyulması oldu. Belə ki, çıxışın sonunda milyonlarla iştirakçının önündə Eldar Cəfərov Annaya evlənmə təklifi etdi. “Bir çox insanların möhtəşəm evlənmə təklifləri həmişə məni maraqlandırıb. Mən bu təklifi etmək üçün ən münasib vaxtı orada milyonların qarşısında etməkdə gördüm. Bundan çox məmnunam” deyən Eldarın təklifinə çox sevindiyini bildirən Anna valideynlərinin bu məsələyə hələ də inanmadıqlarını vurğuladı.

Əldə olunan nailiyyət göstərir ki, Azərbaycan və onun mədəniyyəti getdikcə Avropa cəmiyyətində maraq doğurur. Gələcəkdə keçiriləcək “Eurovision -2009” müsabiqəsində Azərbaycanın qalib olmaq şansları çox böyükdür.

İki sahil.- 2008.- 12 sentyabr.- S. 6.