Yusifova S.

 

Ukrayna sənətçiləri Lökbatan və Sumqayıtda konsert veriblər

 

Azərbaycanda Ukrayna mədəniyyəti günləri çərçivəsində dost ölkənin incəsənət ustaları Qaradağ rayonunun Lökbatan qəsəbəsində konsert proqramı ilə çıxış ediblər. Mədəniyyət Turizm Nazirliyindən bildirilib ki, tədbir Lökbatan qəsəbəsindəki Heydər Əliyev adına parkda keçirilib. Sonra qonaqlar qəsəbədəki Lesya Ukrayinkanın adını daşıyan parkda da olublar.

Ukrayna mədəniyyəti günləri Heydər Əliyev Fondunun təşəbbüsü ilə əsaslı təmir olunan 166 nömrəli məktəb-liseydə davam etdirilib. Tədbirin təşkilini yüksək dəyərləndirən qonaqlar ölkələrimiz arasında mədəniyyət sahəsində əməkdaşlığın səviyyəsindən razı olduqlarını bildiriblər.

Konsert proqramında Ukraynanın xalq artisti Vasili Çepelyuk, əməkdar artistlər Lazuka Mixaylo, Alla Opeyda, Vyaçeslav Siduma Azərbaycan və Ukrayna mahnılarını ifa ediblər. Bundan əlavə, konsertdə milli rəqslər, vokal-xoreoqrafik kompozisiyalar, folklor əsərləri nümayiş olunub.

Ukraynanın incəsənət ustaları Sumqayıtın "Kimyaçılar" mədəniyyət sarayında da konsert veriblər. Tədbirə Ukraynanın ölkəmizdəki səfiri Boris Petroviç Klimçuk da qatılıb. Konsert incəsənət ustalarının ifasında Azərbaycan Ukraynanın dövlət himnlərinin səslənməsi ilə başlayıb. Sonra qonaq sənətçilərin ifasında Ukrayna xalq bəstəkar mahnıları səslənib.

 

525-ci qəzet.- 2008.- 10 sentyabr.- S. 7.