İnformatika kibernetikanın problemləri

 

Bu mövzunda Beynəlxalq konfrans keçirilir

Dünən Bakıda Nəzəri Fizika üzrə Abdus Salam Beynəlxalq Mərkəzi, Azərbaycan Milli Elmlər Akademiyasının (AMEA) Kibernetika və İnformasiya Texnologiyaları institutları, Bakı Dövlət Universitetinin birgə təşkilatçılığı ilə İnformatika və kibernetikanın problemləri mövzusunda ikinci beynəlxalq konfrans keçirilib.

APA-Economicsin məlumatına görə, konfransın açılış mərasimində çıxış edən AMEA-nın prezidenti Mahmud Kərimov bildirib ki, Azərbaycanda İKT-nin 50 illiyinə həsr olunan bu tədbirdə Rusiya, Özbəkistan, İspaniya, İtaliya, Türkiyə, ABŞ, Belarus, Ukraynanın nümayəndələri iştirak edir. Azərbaycanda İKT-nin inkişafının daha dərin tarixinin olduğunu deyən M.Kərimovun sözlərinə görə, ötən 50 il ərzində ölkə alimlərinin informatika kibernetikanın problemlərinin həllində böyük rolu olub.

Azərbaycanın rabitə və informasiya texnologiyaları naziri Əli Abbasov isə əlavə edib ki, son illər respublikada İKT-nin inkişafı dövlət siyasətinə daxil edilib və bu məsələyə dövlət başçısı şəxsən nəzarət edir. Nazirin sözlərinə görə, 2007-ci ildə Azərbaycanda telekommunikasiya sektoru üzrə ümumilikdə 158,4 mln. manat, bu ilin birinci yarısında isə 71,1 mln. manat investisiya yatırılıb. Ə.Abbasov hesab edir ki, bu gün İKT iqtisadiyyatın inkişafına çox ciddi təsir göstərir. İqtisadiyyatın getdikcə rəqəmsallaşdırıldığını deyən nazir onu da əlavə edib ki, ölkələr arasında məlumatların ötürülməsi ilə bağlı çətinliklər var, bu problemin həll olunmaması isə bir necə ildən sonra iqtisadiyyatın inkişafına təsir göstərə bilər. Konfrans plenar sessiyalarla davam etdirilir. Tədbir sentyabrın 12- yekunlaşacaq.

 

İki sahil.- 2008.- 11 sentyabr.- S. 3.