Kamilqızı K.

Alim Qasımov haqqında ən yaxşı yazıların müəllifləri mükafatlandırılıb

Azərbaycanın xalq artisti, muğam ustası Alim Qasımovun 50 illik yubileyi və sənət fəaliyyətinin 30 illiyilə əlaqədar son bir neçə ildə xanəndə haqqında qələmə alınan ən yaxşı yazılar müsabiqə yolu ilə müəyyənləşdirilib. 1000-ə yaxın yazı arasından ən yaxşıları seçmək üçün 3 ay ərzində iş aparılıb. Onlardan cəmi 9-u mükafata layiq yazı kimi seçilib. Həmin yazıların müəllifləri xüsusi hədiyyələrlə mükafatlandırılıb. Bundan əlavə, 10 nəfər tanınmış mədəniyyət adamı da hədiyyələrlə təltif olunub. "Yanar qəlbli Alim" məqaləsinə görə Azər Rzayev, "Alim teatrının sehri" yazısına görə Vaqif İbrahimoğlu, "Sözümüzü Allaha de" məqaləsi üçün millət vəkili Rəfael Hüseynov, "Gün işığı" məqaləsilə Kamil Vəli Nərimanoğlu mükafata layiq görülüblər. "Vokalımızın Alim zirvəsi"nə görə Tofıq Hüseynov, həmçinin qələmə aldıqları yazılara görə Afaq Vasifqızı, Natəyan Faiqqızı, Vaqif Yusifli və Lalə mükafatlandırılıb. Mailə Muradxanlı tərəfindən seçilən məqalələr müxtəlif mövzularda olsa da, onları Alim Qasımov sənətinə vurğunluq və onun yaradıcılığının müxtəlif aspektlərdən təhlili birləşdirir.

Tədbirdə çıxış edən laureatlar Alim Qasımov sənətindən, onun şəxsiyyətindən, insani keyfıyyətlərindən danışıblar. Millət vəkili Rəfael Hüseynov bu tədbirin gələcəkdə ənənəvi hal almasını və hər il bu mükafatın gözəl muğam ifaçılarına verilməsini təklif edib: "Təklif edirəm ki, gələcəkdə Alim və muğam sənəti ilə bağlı elmi araşdırmalar aparılsın. Bundan başqa, mükafat kimi verilən əl fiqurları gələcəkdə Alimin öz əlinin forması əsasında hazırlansın. Bununla da, hər bir mükafatlandırılan şəxs Alim Qasımovdan bir hissəni öz evində hiss etsin".

Tədbirin sonunda ustad xanəndə Alim Qasımovun özü Hacı Eldar tərəfindən hazırlanan xalça ilə təltif olunub. Amma sənətkar iki butanı - özü ilə qızı Fərqanənin təsvir olunduğu əsəri onun yaradıcılığında və bu tədbirin keçirilməsində böyük rolu olan həyat yoldaşı Tamilla xanıma verib.

525-ci qəzet.- 2008.- 8 yanvar.- S. 7.