Bəstəkar Elza
İbrahimovanın yaradıcılıq gecəsi keçirilib
Yanvarın 27-də ölkənin
tanınmış incəsənət
adamları Muğam Teatrında bir araya gəlmişdilər.
Budəfəki toplantının
səbəbkarı görkəmli
bəstəkar, onlarla
gözəl mahnının
müəllifi Elza İbrahimova idi. Təxminən yarım əsrdən bəri Azərbaycan musiqi sənətində özünəməxsus
yeri olan Elza İbrahimova 1938-ci il yanvarın 10-da dünyaya gəlib. Uşaq yaşlarından musiqiyə rəğbətini
görən valideynləri
onu 8 nömrəli musiqi məktəbinin fortepiano sinfinə qoyublar. Sonralar təhsilini Asəf Zeynallı adına musiqi məktəbində davam etdirib. Burada müəllimləri
onun bəstəkarlıq
qabiliyyətini görərək,
uyğun sinfə keçməsini təklif
ediblər. Elza xanımın ən böyük arzularından
biri 1958-ci ildə Konservatoriyaya qəbul olunması ilə yerinə yetib. Əvvəllər Cövdət
Hacıyevin, sonra isə Qara Qarayevin
sinfində təhsil alıb. Çox keçmədən istedadı
və əməksevərliyilə
tanınıb. Mahnılar
yazmaqla yanaşı, ciddi, akademik janrlarda da əsərlər
yaradıb. "İmam
Şamil", "Yanan
laylalar" və
"Afət" operalarının
müəllifidir. Bəxtiyar
Vahabzadə, Əliağa
Kürçaylı, Ənvər
Əlibəyli, Dəmir
Gədəbəyli, Adil
Rəsul, Vahid Əziz, Ramiz Heydər və başqa şairlərin sözlərinə mahnılar
bəstələyib. Onun
əsərlərini Şövkət
Ələkbərova, Rəşid
Behbudov, Gülağa Məmmədov, Hüseynağa
Hadıyev, Sara Qədimova, Lütfiyar İmanov, Leyla Şərifova, İslam Rzayev, Oqtay Ağayev,
İlhamə Quliyeva, Elmira Rəhimova, Flora Kərimova, Akif İslamzadə kimi korifey müğənnilər,
həmçinin müasir
dövrün populyar sənətçiləri ifa
ediblər.
Bəstəkarın Muğam Teatrındakı
yaradıcılıq gecəsini
teatrın rəhbəri
Arif Qazıyev açaraq, tədbirə toplaşanları salamladı.
Gecəni müğənnilərimizin
ifasında Elza İbrahimovanın istedadının
məhsulu olan bir-birindən gözəl musiqilər, həmçinin bəstəkar
haqqında qonaqların
xoş xatirələri,
ürək sözləri
bəzədi. Gecə boyunca
Flora Kərimova bəstəkarın "Ey
Vətən", Lalə
Məmmədova "Dedim",
Elton "Sən yadıma düşəndə",
Cavanşir Məmmədov
"Qurban verərdim",
Firuzə İbadova
"Mən sənin yanına gələndə",
Mətanət İsgəndərli
"Nəğməli çinar",
Nadir Qafarzadə "Gəl barışaq",
Sevinc "Ay parçası" və
başqa mahnılarını
ifa etdilər. E.İbrahimovanın Şəfiqə
Axundova, Ruhəngiz Qasımova, Faiq Sücəddinov, Nailə Mirməmmədli kimi həmkarları, sənət
dostları və digər yaxınları, ziyalılar onun şəxsiyyəti, yaradıcılığı
haqqında yüksək
fikirlər söylədilər.
525-ci qəzet.- 2008.- 29 yanvar.- S. 7.