Son mənzilə

Yanvarın 26-da ölkəmizin ictimaiyyəti milli musiqi sənətinin görkəmli nümayəndəsi, xalq artisti, Azərbaycan Respublikası Prezidentinin fərdi təqaüdçüsü İslam Tapdıq oğlu Rzayevi son mənzilə yola salmışdır.
Mərhumun cənazəsi Rəşid Behbudov adına Dövlət Mahnı Teatrında matəmsayağı bəzədilmiş postament üzərinə qoyulmuşdu. Postamentin ətrafına Azərbaycan Prezidenti İlham Əliyevin adından, habelə hökumət təşkilatları, müxtəlif kollektivlər adından əklillər düzülmüşdü.
Salonda həzin matəm musiqisi və mərhumun ifa etdiyi mahnılardan parçalar səslənirdi.
İslam Rzayevin həmkarları, dostları, tanışları, tanınmış mədəniyyət və incəsənət xadimləri, mərhumun yaradıcılığının pərəstişkarları axın-axın teatrın binasına gəlir, görkəmli sənətkara və gözəl insana son borclarını verirdilər.
Matəm mərasimini açan mədəniyyət və turizm nazirinin müavini Ədalət Vəliyev Heydər Əliyev Fondunun və Azərbaycan Mədəniyyətinin Dostları Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın görkəmli muğam ifaçısı İslam Rzayevin vəfatı ilə əlaqədar mərhumun ailəsinə ünvanlanmış başsağlığının mətnini oxudu.
Azərbaycan Milli Konservatoriyasının rektoru, xalq artisti, professor Siyavuş Kərimi, xalq artistləri Arif Babayev, Şəfiqə Eyvazova, Canəli Əkbərov, Mələkxanım Əyyubova və əməkdar incəsənət xadimi Arif Qazıyev Qarabağ xanəndəlik məktəbinin tanınmış nümayəndəsi və layiqli davamçısı olmuş İslam Rzayev haqqında ürək sözlərini söylədilər, onunla bağlı xatirələrini danışdılar. Sənət dostları İslam Rzayevi milli musiqi xəzinəmizi zənginləşdirən istedadlı ifaçı kimi səciyyələndirdilər. Bildirildi ki, xüsusi musiqi zövqü və duyumu olan İslam Rzayev Azərbaycan xanəndəlik məktəbinin inkişafına mühüm töhfələr vermiş, onun böyük məharətlə ifa etdiyi muğamlar milli muğam sənətinin qızıl fonduna daxil olmuşdur. İyirmi il "Muğam Teatrı"nda bədii rəhbər kimi fəaliyyət göstərən sənətkar gənc muğam ustalarının yetişdirilməsində böyük xidmət göstərmişdir.
Çıxış edənlər İslam Rzayevin yüksək şəxsi keyfiyyətlərindən də danışdılar, onun əməyinin yüksək qiymətləndirildiyini, müstəqil Azərbaycan Respublikasının ali mükafatı olan "Şöhrət" ordeninə layiq görüldüyünü xatırladaraq, tanınmış muğam ifaçısı, gözəl pedaqoq və təvazökar insan İslam Rzayevin xatirəsinin xalqımızın qəlbində daim yaşayacağını vurğuladılar.
Mərhumun ailəsi adından çıxış edən Natiq Rzayev atasına, onun xatirəsinə göstərilən ehtirama görə ölkə rəhbərliyinə dərin minnətdarlığını bildirdi, matəm mərasiminin iştirakçılarına təşəkkür etdi.
Sonra ailə üzvləri, qohumları mərhumla vidalaşdılar.
***
İslam Tapdıq oğlu Rzayevin cənazəsi Rəşid Behbudov adına Dövlət Mahnı Teatrından qaldırılaraq İkinci Fəxri xiyabana gətirildi. Burada mərhumun ruhuna dua oxundu, əziz xatirəsi sənətsevərlərin qəlbində əbədi yaşayacaq müğənninin cənazəsi doğma torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin, qəbri nurla dolsun!

Azərbaycan.- 2008.- 27 yanvar.- S. 3.