İbrahimova S

Toylara getsəydim, Mübariz Tağıyev olmazdım

Müğənniyə dövlətdən dəstək gəlib

Estradamızın parlaq ifaçılarından olan Xalq artisti Mübariz Tağıyevin 60 yaşı tamam olur. Müğənni "Kaspi"nin müxbiri ilə söhbətində yubileyin dövlətin diqqətində olduğunu xatırlatdı. O bildirdi ki, iki gündən sonra yaxın dostlarının təşəbbüsü ilə məclis təşkil olunacaq. Bundan öncə isə ailə üzvləri ilə birlikdə doğum gününü qeyd edəcək. Yubileyin dövlət səviyyəsində keçirilməsi isə yaz aylarına planlaşdırılır. "Bildiyiniz kimi, mənim çoxdan bəri planlaşdırdığım konsertim təxirə düşüb, onu yüksək səviyyədə təşkil etmək istəyirik. Mənə yaxın olan insanlarla bu qənaətə gəlmişik ki, yaz aylarında konsertim dövlət səviyyəsində olsun".

- Niyə konserti bu qədər gecikdirirsiniz?

- Hazırlıqlar bu qədər vaxt aparacaq. Bir neçə il öncə proqram müəyyən etdim. Lakin maliyyə çatışmazlığı üzündən konsert arzum gerçəkləşmədi. Sənətkarın qapı-qapı düşməsi ayıb sayılır, mən özümü belələrinn sırasına qatmaq istəmədim. Sakitcə oturub kimin mənə müraciət edəcəyini gözlədim. Təəssüf ki, həmin ərəfədə sənətkardan çox, şou biznes nümayəndələrinin qapısı döyüldü, onların arzu və istəkləri nəzərə alınırdı. Mən isə susub oturdum. Bəzi təşkilatlar boyun olmaq istəsə də, onların şərtləri məni qane etmədi. Çünki mən dünənin müğənnisi deyiləm, özümə və sənətimə hörmət edirəm.

- Dövlətin dəstək olduğu konsert hansı ssenari üzrə təşkil olunacaq?

- Sadə bir konsert olacaq. Daha çox yaxın sənət dostlarım, dövlət nümayəndələrini və KİV əməkdaşlarını dəvəti etməyi düşünürəm. Hələlik proqramı müəyyən edirəm. Bura daha çox köhnə repertuardan mahnılar daxil etməyi düşünürəm. Məni Estrada Simfonik Orkestri müşayiət edəcək.

- Yeri gəlmişkən, estradanın bugünkü durumunu necə qiymətləndirirsiniz?

- Bir sözlə deyərdim ki, yaxşı oxuyanların sayı azalıb. Avropaya meyil etdikcə ənənələrimizi unuduruq. Yaxşı oxuyanlarla da çalışan peşəkarlar yoxdur. Mənim təmsil olunduğum "Yeni ulduz" mahnı yarışmasında istedadlı uşaqlar az deyil. Onlarla müsabiqə çərçivəsində çalışır, formalaşdıra bilirik. Amma efir bitəndən sonra bəziləri toylara, şou-proqramalara meyillənir. Bu da onların peşəkar ifaçı kimi yetişməsinə mane olur.

- Toylardan söz düşmüşkən, bildiyimizə görə, heç vaxt el şənliyi dəvətlərini qəbul etməmisiniz?

- Çünki sənətimi hər şeydən üstün tutmuşam. Müəllimim Rəşid Behbudov qarşımda şərt qoymuşdu: "Ya toy, ya sənət". Mən ikincini seçdim. Uduzmadığım qənaətindəyəm. Əslində, toylara getsəydim, durumum bundan qat-qat yaxşı olardı. Amma Mübariz Tağıyev olmazdım. Məlumdur ki, mahnı ifaçılarının pula ehtiyacı daha çoxdur - klip çəkdirmək, albom çıxarmaq və s. Bir çoxu bu xətti tutaraq həmkarları ilə ayaqlaşmağa çalışır. Düzdür, mənim albom və disklərimin sayı az deyil. Ancaq heç vaxt düşünməmişəm ki, bunları ərsəyə gətirmək üçün toylara getməliyəm. Allah lazım bildiyi

Kaspi.- 2007.- 31 yanvar.- S. 17.