Dünyanın bir sıra ölkələrində 20 Yanvar faciəsi qurbanlarının xatirəsini anmışlar

İsraildə Azərbaycan diasporunun təmsilçisi - Yaxın Şərq Azərbaycan Konqresinin təşəbbüsü ilə 20 Yanvar faciəsinin 18-ci ildönümü, Ümumxalq Hüzn Günü münasibətilə tədbir keçirilib. Konqresin Təl-Əvivdəki mərkəzi ofisində təşkil olunmuş anım mərasimində diaspor təşkilatının üzvləri, 20 Yanvar faciəsinin canlı şahidləri ilə yanaşı İsrailin rəsmi orqanlarının, işgüzar elitasının, eləcə də bu ölkədə fəaliyyət göstərən beynəlxalq və diplomatik korpusların nümayəndələri də iştirak etmişlər. Tədbir haqqında məlumatı bizə Yaxın Şərq Azərbaycan Konqresinin üzvü xanım Liya Mikdaş verib.
Mərasimi giriş sözü ilə Yaxın Şərq Azərbaycan Konqresinin prezidenti Aleks Şapiro açaraq 20 Yanvar faciəsinin başvermə səbəbləri, nəticələri və o dövrkü hadisələrin Azərbaycan xalqının yaddaşında buraxdığı iz barədə danışdı. Aleks Şapiro Azərbaycan xalqının erməni separatizmi əleyhinə mütəşəkkil çıxışlarının mərkəzi hakimiyyətin ədalətsiz münasibəti fonunda böyüyərək istiqlaliyyət, müstəqil dövlət uğrunda milli-azadlıq hərəkatına çevrildiyini xatırladaraq 20 Yanvar faciəsini dağılmaqda olan sovet rejiminin həyata keçirdiyi cəza tədbiri kimi dəyərləndirdi.
Konqresin icraçı direktoru, beynəlxalq münasibətlər üzrə ekspert Arye Qut 20 Yanvar faciəsinin Azərbaycan xalqının XX əsrdə yaşadığı ən qanlı hadisələrdən biri olduğunu dedi. Arye Qut 20 Yanvar faciəsini eyni tarixi dövrün analoji - Tbilisi və Vilnüs hadisələri ilə müqayisə edərək bu aksiyanın daha qanlı, qəddar və vəhşicəsinə törədilməsinin səbəblərini sovet rejiminin anti-insani mahiyyətində gördü. O, azərbaycanlılarla bərabər müxtəlif millətlərdən olan Azərbaycan vətəndaşlarının vəhşicəsinə qətlə yetirildiyini, onların qardaşlıq məzarında, Bakının ən uca məkanında - Şəhidlər xiyabanında birgə uyuduqlarını xatırlatdı. Arye Qut harada yaşamalarından asılı olmayaraq Azərbaycanın bu faciəvi, eyni zamanda şərəfli tarixini heç vaxt unutmayacaqlarını söylədi.
Konqresin vitse-prezidenti, Holonsk Universitetinin professoru Bəxtiyar Yaqubov M. Qorbaçovun sözdə başladığı "demokratikləşmə" ilə Kremlin əməldə Bakıda törətdiyi vəhşilik arasında analogiya apardı. Professor o gecə nəinki dinc nümayişçilərə, hərbi texnika və silah nişangahına düşən hər kəsə - uşaq və qadınlara, qoca və əlillərə, tibb personalı və yaralılara, hətta evlərində olan vətəndaşlara divan tutulduğunu, onların beynəlxalq konvensiyalarla qadağan olunmuş güllələrlə amansızcasına qətlə yetirildiklərini bir daha tədbir iştirakçılarının diqqətinə çatdırdı.
Konqresin digər vitse-prezidenti, əslən Oğuz rayonundan olan Rabay Xananayev faciə baş verən gün Bakıda olduğunu, dəhşətli hadisələri gözləri ilə gördüyünü bildirdi, üstündən 18 il keçməsinə baxmayaraq, yaşadığı dəhşəti unuda bilmədiyini, zatən onun və Azərbaycan xalqının bunu heç bir zaman unutmayacağını əminliklə söylədi. Vitse-prezident 20 Yanvar faciəsini məqsədyönlü şəkildə həyata keçirilmiş qeyri-qanunu hərbi-siyasi aksiya adlandırdı və buna görə mərkəzi sovet aparatının, həmçinin onun Azərbaycandakı fərsiz təmsilçilərinin məsuliyyət daşıdığını qeyd etdi.
Anım mərasimində "Herut" partiyasının sədri Knesseta Mixael də çıxış edərək hiss və düşüncələrini tədbir iştirakçıları ilə bölüşdü. İsrailli siyasətçi 20 Yanvar faciəsinin nəinki Azərbaycanda, bütün ittifaq məkanında sovet hakimiyyətinə olan inamı sarsıtdığını vurğulayaraq o dövrün olaylarını sovet imperiyasının dağılmasının başlanğıcı kimi dəyərləndirdi.
Mərkəzi Təl-Əvivdə yerləşən Yaxın Şərq Azərbaycan Konqresinin 20 Yanvar faciəsinin 18-ci ildönümü, Ümumxalq Hüzn Günü münasibətilə keçirdiyi tədbirdə Azərbaycanın milli və dövlət müstəqilliyi, ərazi bütövlüyü naminə canlarını fəda etmiş bütün şəhidlərin xatirəsi ehtiramla yad edildi, bir daha bənzər faciələrin yaşanmaması, xalqımızın düçar olduğu bəlalardan - erməni işğalından qurtulması naminə görüləcək işlərdən danışıldı.

Azərbaycan.- 2008.- 22 yanvar.- S. 6.