Heydər Əliyev Muzeyinin açılışı

Azərbaycan Prezidenti İlham Əliyev yanvarın 17-də Ağcabədi rayonunda Heydər Əliyev Muzeyinin açılışında iştirak etmişdir.

Rəmzi açılışı bildirən lenti kəsən dövlətimizin başçısı İlham Əliyev xanımı Mehriban Əliyeva ilə birgə muzeylə yaxından tanıs oldular.

İki mərtəbədən ibarət və müasir görünüşə malik muzeyin birinci mərtəbəsində ulu öndərin büstü qoyulmuşdur. Burada konfrans salonu, kompüter otağı, məktəblilər üçün sinif otaqları vardır. Bildirildi ki, məktəblilər muzeyə gələrək, ulu öndərin zəngin həyatı, fəaliyyəti və irsi ilə tanış olacaqlar. İkinci mərtəbədə eksponat salonu yerləşir. Yaradılmış xüsusi guşələrdə ulu öndərin uşaqlıq və gənclik illərindən, ailə həyatından, Dövlət Təhlükəsizlik Komitəsində işlədiyi illərdən, Azərbaycana rəhbərliyinin hər iki dövründən bəhs edən fotoşəkillər, dahi şəxsiyyət haqqında yazılmış kitablar toplanmışdır. Burada ümummilli liderimizin Qarabağ bölgəsinə, o cümlədən Ağcabədiyə 1970-ci illərdə dörd dəfə, 1993-cü ildən sonra isə iki dəfə səfərinə, keçirdiyi görüşlərə dair fotoşəkillər və materiallarla da tanış olmaq mümkündür.

Dövlətimizin başçısı muzeyin ayrı-ayrı guşələri ilə tanış oldu, fəxri qonaqlar kitabına ürək sözlərini yazdı.

Prezident İlham Əliyev və xanımı Mehriban Əliyeva ulu öndər Heydər Əliyevin həyat və fəaliyyətindən bəhs edən filmə baxdılar.

Dövlətimizin başçısına ümummilli lider Heydər Əliyevin Ağcabədiyə səfərlərini əks etdirən fotoalbom təqdim olundu.

Azərbaycan.- 2008.- 19 yanvar.- S. 6.