Samirə

Qazaxıstan gerbinin müəllifi Tahir Salahovdur

İstedad sərhəd bilməz

Dünyaşöhrətli fırça ustası Tahir Salahovun 80 illik yubileyinə həsr olunmuş tədbirlər və sərgilər davam etməkdədir.

Rusiyanın və Azərbaycanın təsviri sənətinin fəxri olan bu insanın daha bir fərdi sərgisi Moskvada "Yekaterina" Mədəniyyət Fondunun qalereyasında açılıb. Retrospektiv xarakter daşıyan vernisaj "Tahir Salahov. Rəngkarlıq. Qrafika" adı altında təqdim edilir. Sərginin təşkilatçıları qismində Rusiya Federasiyası Mədəniyyət Nazirliyinin, Azərbaycan Respublikası Mədəniyyət və Turizm Nazirliyinin, Heydər Əliyev Fondunun, Rusiya Rəssamlıq Akademiyasının və Azərbaycanın Rusiyadakı səfirliyinin dayağı ilə "AYDAN QALEREYA" və "Yekaterina" Mədəniyyət Fondu çıxış edib.

Təsviri sənətdə "sərt üslub"un banisi sayılan Tahir Salahovun fərdi sərgisi Moskvanın zəngin mədəni həyatında özgün mədəni hadisə kimi qiymətləndirilib. Vernisaja baş çəkənlər zəmanəmizin dahi fırça ustasının ən geniş yayılmış əsərlərindən bir daha zövq almaq imkanı qazanıblar. Rəssamın qızı Aydan Salahovanın dediyinə görə, hər bir rəssam, eləcə də T.Salahov üçün yaradıcılığının bütün nümunələrini toplu halında görmək böyük töhfədir. O, vernisajın təşkilində əməyi olmuş hər kəsə minnətdarlığını bildirib. Yubilyarın özü də mətbuat konfransında təşkilatçılara və iştirakçılara təşəkkürünü bildirərək bu günün, sərginin keçirildiyi qalereyanın onun üçün xüsusi əhəmiyyət daşıdığını qeyd edib. T.Salahov: "Bu gün mən sərgini nəzərdən keçirdikdə işlərimin mənim üçün yeni məna kəsb etdiyini duydum, onları bir qədər fərqli tərzdə qavradım. Bu çox maraqlıdır".

Vernisajın açılışı tam anşlaq şəraitində keçib. Azərbaycanın Rusiyadakı səfiri Polad Bülbüloğlu, Federasiya Şurasının Mədəniyyət Komitəsinin sədri Aleksandr Zasoxov, Rusiya prezidentinin beynəlxalq mədəni əlaqələr üzrə xüsusi nümayəndəsi Mixail Şvıdkoy, mədəniyyət nazirinin müavini Pavel Xoroşilov, İosif Kobzon, Zurab Sereteli, Edvard Radzinski, Vera Qlaqolzeva kimi mədəniyyət və incəsənət xadimləri görkəmli həmyerlimizi təbrik edərək ürək sözlərini söyləyiblər. P.Bülbüloğlu T.Salahovun bu gün yaradıcılıqla məşğul olmasından böyük məmnunluq duyduğunu deyib. A.Zasoxov isə belə bir əhvalat danışıb: "Bir dəfə Tahir Salahov, Oljas Süleymenov və mən söhbət edərkən Oljas dedi ki, müstəqil Qazaxıstanın gerbi yoxdur. Tahir Salahov bunu eşidən kimi masanın üstündəki salfeti götürdü, Oljasdan qazax eposu haqqında danışmağı xahiş etdi və gerbin təsvirini çəkməyə başladı. Beləliklə, bu gün yubiley sərgisinə toplaşdığımız maestro Qazaxıstanın gerbinin müəllifidir". Zasoxov T.Salahov kimi şəxsiyyət yetirdiyi üçün Azərbaycan xalqına təşəkkürünü də bildirib.

Rusiya Rəssamlıq Akademiyasının prezidenti Z.Sereteli yubilyara akademiyanın ən yüksək mükafatı olan "Şöhrət" ordenini təqdim edib.

Tanınmış tarixçi E.Radzinski isə vurğulayıb ki, "müasir qaba təbirlə dedikdə Tahir Salahov brend, normal ifadə ilə dilə gətirdikdə isə adı böyük hərflə yazılan yaradıcı şəxsiyyətdir. Onun əsərlərini seyr etdikcə yaşamaq istəyirsən".

Kinoaktrisa V.Qlaqolyeva T.Salahov barədəki təəssüratlarını belə ifadə edib: "Mənim üçün Tahir Salahov dövrümüzün ən vicdanlı, ən müdrik, ən sevimli insanlarından biridir. O, çox düzgün yaşayır. Bu dünyada adamlar üçün ümumiyyətlə, necə yaşamaq nümunəsi olan insanlar çox azdır. Mən xoşbəxtəm ki, Tahir Salahovu tanıyıram, hətta onun dostlarından biriyəm".

Həftə içi.- 2009.- 17-19 yanvar.- S. 7.