İndoneziya Universitetində Azərbaycan guşəsi açılıb

Bakı, (AzərTAc). Yanvarın 20-də İndoneziyanın Syarif Hidayətullah adına Dövlət İslam Universitetinin ədəbiyyat və humanitar elmlər fakültəsində Azərbaycan guşəsinin açılışı olmuş, "Azərbaycan bu gün" mövzusunda seminar keçirilmişdir.

Hər iki tədbirdə Azərbaycanın İndoneziyadakı səfiri İbrahim Hacıyev, İndoneziya Xarici

lişlər Nazirliyinin Azərbaycan üzrə əlaqələndiricisi Hikmət Moelcavan, universitetin rəhbər şəxsləri, ali təhsil ocağının professor-müəllim və tələbə heyəti, səfirliyin əməkdaşları və jurnalistlər iştirak etmişlər.

Prorektor Sudarnoto Əbdül Hakim, universitetin ədəbiyyat və humanitar elmlər fakültəsinin dekanı Əbdül Xayr təhsil ocağında Azərbaycan guşəsinin açılmasını yüksək qiymətləndirmiş, bunun ölkələrimiz arasında əlaqələrin inkişafına töhfə verəcəyinə ümid etdiklərini bildirmişlər.

Səfir İbrahim Hacıyev Azərbaycan Prezidentinin İndoneziya ilə əlaqələrin və əməkdaşlığın genişlənməsinə böyük əhəmiyyət verdiyini qeyd etmiş, ölkələrimiz arasında münasibətlərin inkişaf səviyyəsindən məmnunluğunu bildirmişdir. Səfir Dövlət İslam Universitetində Azərbaycan guşəsinin açılmasını Azərbaycan-İndoneziya əməkdaşlığının bütün istiqamətlərdə uğurla inkişafının təzahürü olduğunu vurğulamış, bu cür mərkəzlərin ölkənin digər aparıcı təhsil ocaqlarında da açılacağına ümidvar olduğunu bildirmişdir.

İ.Hacıyev seminarda çıxış edərək, 20 Yanvar faciəsindən danışmış, bu günün Azərbaycan tarixinin qəhrəmanlıq səhifəsi olduğunu, xalqımızın yenilməzliyini, azadlıq uğrunda mübarizə əzmini bütün dünyaya nümayiş etdirdiyini demişdir.

Səfir Azərbaycanın tarixi, müasir həyatı, inkişafı, dünyada artan nüfuzu, beynəlxalq və

regional layihələrdə aparıcı rolu barədə məlumat vermişdir.

Azərbaycanda aparılan demokratik islahatlardan danışan İ.Hacıyev, Prezident İlham Əliyevin ötən ilin oktyabrında keçirilmiş seçkilərdə xalqın böyük etimadını qazanaraq yenidən beş il müddətinə dövlət başçısı seçildiyini, bunun demokratiyanın yeni, daha yüksək mərhələyə təkamülünün göstəricisi olduğunu dinləyicilərin nəzərinə çatdırmışdır.

Tədbirdə Azərbaycanda din və etiqad azadlığının tam təmin olunduğu bildirilmiş, Ermənistan-Azərbaycan, Dağlıq Qarabağ münaqişəsi, onun ağır nəticələri, Azərbaycan rəhbərliyinin münaqişənin sülh yolu ilə həlli istiqamətində səyləri barədə məlumat verilmişdir. Diplomat Avropanın və Asiyanın kəsişməsində yerləşən Azərbaycanın əlverişli geostrateji mövqeyindən də bəhs etmişdir.

İ.Hacıyev universitetdəki Azərbaycan guşəsinin Qafqaz regionu va Xəzər hövzəsi ölkələrinin öyrənilməsinə yardım edəcəyinə ümid etdiyini bildirmişdir.

H.Moelcavan Dövlət İslam Universitetində Azərbaycan guşəsinin açılmasının Azərbaycan-İndoneziya əməkdaşlığı baxımından əlamətdar hadisə olduğunu, guşənin iki ölkə və xalq arasında əlaqələrin inkişafına, Azərbaycanın İndoneziyada daha yaxından tanınmasına yardım edəcəyini qeyd etmişdir.

Sonra səfir İ.Hacıyev sualları cavablandırmışdır.

Seminar iştirakçıları 20 Yanvar hadisələri barədə məlumatlandırılmış, faciəni əks etdirən fotoşəkillər nümayiş etdirilmişdir.

Tədbir iştirakçılarına Azərbaycan haqqında əyani vasitələr paylanmışdır.

Azərbaycan xəritəsi, Heydər Əliyev Fondunun hazırladığı "Qarabağ həqiqətləri" bukletlər toplusu və "Azərbaycana qarşı müharibə: mədəni irsin hədəfə alınması" kitabı, səfirliyin Ermənistan-Azərbaycan, Dağlıq Qarabağ münaqişəsi, Azərbaycanın tarixi, mədəniyyəti və turizm imkanları barədə hazırladığı kitablar və DVD, Ermənistan-Azərbaycan, Dağlıq Qarabağ münaqişəsi barədə digər materiallar Azərbaycan guşəsinə hədiyyə edilmişdir.

İki sahil.- 2009.- 22 yanvar.- S.6.