Nümayəndə heyəti TÜRKSOY-un yubiley tədbirində iştirak edib

Mədəniyyət və Turizm naziri Əbülfəs Qarayevin rəhbərlik etdiyi nümayəndə heyəti TÜRKSOY-un yaranmasının 15 illik yubiley tədbirində iştirak edib. Mədəniyyət və Turizm Nazirliyinin mətbuat xidmətindən APA-ya bildirilib ki, yubiley tədbirində "TÜRKSOY"-a üzv döv-lətlərin mədəniyyət nazirləri, konservatoriya rektorları, üzv dövlətlərin keçmiş mədəniy-yət nazirləri, son illərdə TÜRKSOY təşkilatı ilə sıx əməkdaşlıq edən şəxslər iştirak ediblər.

Azərbaycan nümayəndə heyətində Azərbaycan Yazıçılar Birliyinin sədri Anar Rzayev, Ü.Hacıbəyov adına Bakı Musiqi Akademiyasının rektoru Fərhad Bədəlbəyli, TÜRKSOY binasının memarı, akademik Cəfər Qiyasi və Dövlət Akademik Opera və Balet Teatrının solistləri Nikolay Peşerov və Sevinc Hüseynli təmsil olunub. Yubiley tədbiri türk xalqlarının ənənəvi və klassik musiqi kqmpozisiyalarından ibarət "TÜRKSOY ulduzları" adlı konsert proqramı ilə açılıb.

Yubiley tədbiri çərçivəsində Ə.Qarayevin sədrliyi altında TÜRKSOY-un binasında üzv ölkələrin mədəniyyət nazirlərinin İşçi toplantısı keçirilib. İclas zamanı "TÜRKSOY-un şərəf medalı" və TÜRKSOY-un 15 illiyi ilə əlaqədar şərəf medalı veriləcək şəxslərin adlannın təsdiq edilməsi, təşkilatın 2009-cu il üçün Fəaliyyət Planı və TÜRKSOY Baş Direktorluğu işçilərinin əmək haqlarının artırılması ilə bağlı aparılan müzakirələr üstünlük təşkil edib. Ə.Qarayev 2009-cu il üçün Bakı şəhərinin İslam mədəniyyətinin paytaxtı elan olunması ilə əlaqədar hazırlanmış tədbirlər planı çərçivəsində bu ilin oktyabrında Bakıda baş tutacaq İslam Konfransı Təşkilatına üzv ölkələrin mədəniyyət nazirlərinin konfransını nəzərə alaraq, TÜRKSOY Daimi Şurasının növbəti XXVI iclasının da cari ilin oktyabrında keçirilməsi təklifi ilə çıxış edib. Bu təklif toplantı iştirakçıları tərəfindən qəbul edilib. Yubiley tədbirinin sonunda Ankaranın Bilkənd Universitetinin konsert salonunda TÜRKSOY-un 15 illiyinə həsr olunmuş yubiley konserti keçirilib. Konsertdə Şimali Kipr Türk Respublikasının prezidenti, Türkiyənin mədəniyyət və turizm naziri, Azərbaycanın Rusiya.Federasiyasındakı səfiri, TÜRKSOY-un keçmiş baş direktoru və digər tanınmış şəxslər iştirak ediblər.

İki sahil.- 2009.- 27 yanvar.- S. 8.