Sənət adamları təsadüfi musiqiçilərə etiraz edirlər

Telekanallar mənəviyyata zidd verilişləri yığışdırmağa çağırılır

Bir qrup tanınmış mədəniyyət xadiminin deputatların özəl televiziyalarda milli-mənəvi dəyərlərə mənfi təsir göstərən verilişlərin yığışdırılması ilə bağlı bəyanatını dəstəkləməsi marağa səbəb olub. Xatırladaq ki, bəyanatı aktyorlar Yaşar Nuri, Hacı İsmayılov, Telman Adıgözəlov, Firəngiz Mütəllibova, Rəfael Dadaşov, müğənnilər Fidan və Xuraman Qasımova bacıları, Natəvan Şeyxova, Flora Kərimova, Gülyaz və Gülyanaq Məmmədova bacıları, Azərin, Ağadadaş Ağayev, Aybəniz Haşımova, Nuriyyə Huseynova, kaman ifaçısı Habil Əliyev və başqaları imzalayıblar. Müraciətdə özəl televiziyaların efirində şou xarakterli verilişlərin sayının artması, keyfiyyətin aşağı düşməsi barədə narahatlıq ifadə olunub: "Efir məkanını işğal etmiş, mənəviyyatımız, milli ruhumuz, azərbaycançılıq ideyasına zərbə vuran, bayağılıqda bir-biri ilə rəqabətə girmiş verilişlərin sayı artır. Qalmaqallarda adları hallandırılan, mənəviyyatı ictimai qınağa çevrilmiş qeyri-peşəkar aparıcılar milli dəyərlər, ailə problemləri, zövqlə bağlı məsələlər haqda öz qüsurlu və ziyanlı mövqelərini xalqımıza yeridirlər".

Sənət adamları bildirirlər ki, özəl televiziyalarda bəzi verilişlər zövq yaratmaq əvəzinə onu korlayır, şou çirkabı, təlxəklik "mədəniyyəti", millətə ögey prioritetlər yeridirlər: "Biz - Azərbaycan incəsənətində öz sözünü demiş sənətkarlar millət vəkillərinə dəstək kampaniyasına qoşulur və televiziya kanallarını milli mənəviyyatımıza zidd, yad musiqili, səsi olmayan, xaric ifalara yer verən, aparıcılarının qeyri-peşəkarlığı ilə seçilən verilişlərini efirlərindən uzaqlaşdırmağa çağırırıq".

Mövzuya eyni zamanda fərdi şəkildə münasibətini bildirən Xalq artisti Habil Əliyev onu narahat edən məsələlərdən danışdı: "Mən efirdə sənətkar görə bilmirəm. Ekranı şou-biznes nümayəndələri tutub ki, onların bir hissəsi çılpaq qadınlar, bir hissəsi isə üz cizgilərini qadınlaşdıran, qulaqlarına sırğa taxan kişilərdir. Ekrana baxan insanlar söhbətin kimdən getdiyini yaxşı anlayırlar".

82 yaşlı Habil Əliyevin fikrincə, o, istədiyi verilişləri çətin ki, bundan sonra izləyə bilsin: "Lap biz müraciət etdik. Bir-iki gün düzələcək, sonra yenidən köhnə problemlər baş qaldıracaq".

Xalq artisti Əlibaba Məmmədov isə hesab edir ki, nəinki şou-biznes nümayəndələri, hətta muğama təsadüfi gələnlər də sənətkarlardan çox təbliğ olunur: "Bunun da günahı birbaşa televiziya kanallarındadır. Əgər savadsız musiqiçiləri efirə buraxmasalar, hər yoldan keçən xanəndə, yaxud estrada müğənnisi olmaz".

Əlibaba Məmmədovun əlavəsinə görə, estradada sözünü demiş müğənnilər - Aygün Kazımova, Brilliant Dadaşova, Zülfiyyə Xanbabayeva və başqaları gənclərə tövsiyə olmalıdır: "Onların atdığı addımı sabah səhnəyə gələn gənc müğənni təkrarlayır. Ona görə də adını çəkdiyim və çəkmədiyim istər estrada, istərsə də muğam ifaçıları hər bir davranışına diqqət yetirməli, gənclərə düzgün yol göstərməlidirlər".

Müraciətə qoşulan Gülyaz və Gülyanaq Məmmədova bacıları efirdə mənəvi dəyrələrin önə çəkilməsini vacib hesab edirlər. Gülyaz xanımın səfərdə olduğunu deyən Gülyanaq Məmmədova hər ikisinin adından bunları qeyd etdi: "Bizim də amalımız eynidir - efiri açıq geyimi, boş söhbətləri ilə zəbt edənlər yığışdırılsın və əvəzində sözü əsl sənət və sənətkarlar desin. Şəxsən məni narahat edən məqamlardan biri səviyyə söhbətidir. Hərdən məni hansısa bir müğənni ilə eyni verilişə dəvət edəndə, xəcalət çəkirəm. Onun yersiz çıxışları, səviyyəsiz söhbətləri məni narahat etsə də, danışmamağa çalışıram. Bilirəm ki, efirə baxan tamaşaçının gözü tərəzidir və kimin kim olduğunu yaxşı bilir. Buna baxmayaraq, efirdə məhdudiyyətlərin aparılmasını vacib sayıram. Senzura nə qədər böyük rol oynasa, bir o qədər də təsadüfi insanlar arxa plana keçiriləcək".

Kaspi.- 2009.- 9 yanvar.- S. 11.