İlham Namiq Kamaldan yubiley hesabatı

Bu gün Musiqili Komediya Teatrının aktyoru və İlham Miniatür Teatrının rəhbəri, xalq artisti İlham Namiq Kamalın 60 yaşı tamam olur. Ömrünün yarısını sənətə həsr edən aktyor 60 yaşında tamaşaçılarına hesabat verməyə hazırdımı?

Bizimlə söhbətində o bildirdi ki, hər bir sənət adamının yaradıcılığı mərhələlərə bölünür və bu mərhələ keçdikcə arxaya nəzər yetirir ki, mən nə iş görmüşəm: "Mən də dönüb arxaya baxanda uzun bir yol görürəm. Amma bunları sadalamaq istəmirəm, konkret olaraq, indiyə qədər istər teatrda, istərsə də, filmlərdə yaratdığım obrazları yada salmaq kifayət edir. Aktyorluq sənətinin şərəfli olduğunu deyən İlham müəllim bunun bir o qədər də çətin və məsuliyyətli olduğunu bildirdi. O, qeyd etdi ki, tamaşada cilddən-cildə girib, başqasının maskasını taxmaq və onun kimi düşünmək olduqca çətindir: "Əgər bu, asan olsaydı, onu hamı edərdi. Aktyorluq yeganə sənətdir ki, həm rol oynayanda, həm də məşq edəndə adam ürəyinin müəyyən tellərini, əsəbini itirir. Aktyor sənəti əsəb üzərində qurulub. Tamaşaçı gəlib gülür, ancaq sən o vəziyyəti ifa etmək üçün nə qədər əsəb gərginliyi keçirirsən". İlham Namiq Kamal sənətdə sözünü demiş bir sənətkar kimi bu sənəti davam etdirən gənclərdən də söhbət açdı. Azərbaycanda istedadlı gənclər yetişdiyini deyən aktyor, istedadsızların da olduğunu bildirdi: "Sənət aləmində gülməli adamlar da çoxdur. Onlara nəinki səhnədə, adi halda küçə ilə gedərkən də güləcəklər. Bir də var ki, cəmiyyətdə olan insanlardan fərqlənməyən adi insan. Ancaq o, səhnədə elə maraqlı gülüş vəziyyətləri, xarakter yaradır ki, heyran qalırsan. Bax, budur bizim aktyor sənəti. Aktyor sənəti də yalnız o zaman qiymətlənir. Biri var, savadsız adamın səhnədə oynadığı alverçi obrazı, biri də var savadlı adamın təqdim etdiyi analoji obraz. Bunlar tam fərqlidir. Hər bir sənət adamı öz tərbiyəsini səhnəyə gətirir. Mədəni, səviyyəli bir aktyorun səhnəyə gətirdiyi obraz həmişə maraqlı bir qalereya kimi qalır. Bəsit, dayaz adamın gətirdiyi xarakter isə silinib gedir".

Sonda aktyor onu da vurğuladı ki, ad gününü hazırda dostlarının əhatəsində keçirsə də, yubileyi apreldə Mədəniyyət və Turizm Nazirliyi tərəfindən qeyd olunacaq. Onun sözlərinə görə, onun haqqında yubileylə əlaqədar "Teatr - məhəbbətim mənim" adlı kitab hazırlanır.

Üç nöqtə.- 2009.- 9 yanvar.- S. 13.