Xatirə

Rəqs qruplarımız tanınırmı?

Mükəmməl tarixi olan milli rəqslərimiz var. Bəs Azərbaycan rəqsləri xaricdə əvvəlki həvəslə qarşılanırmı və bütün dünyada tanınan rəqs qrupumuz varmı? Bu sualla baletmeyster Zakir Ağayevə müraciət etdik: "O həvəs bu gün də var. Üstəlik, son zamanlar biz rəqslərə bir qədər fərqli yanaşırıq. Mahnı Teatrında həm Azərbaycan rəqslərini, həm də dünya xalqlarının rəqslərini ifa edirik. Amma son zamanlar düşünürük ki, əgər biz digər xalqların rəqslərini ifa ediriksə, niyə digər xalqlar bizim rəqsləri ifa etmirlər? İndi bizim diasporumuz bütün dünyada çox gözəl təşkilatçılıq edir. Onlar həmin baletmeysterləri həmin ölkələrə dəvət edə bilər və bunun sayəsində digər xalqlar da bizim rəqs mədəniyyətimizi öyrənərlər. Qaldı rəqs qruplarımızın tanınmağına, bizdə olan rəqs qruplarının müəllimləri məndən inciməsinlər: onlar bir az tənbəldirlər. Həm də bizim ən məşhur rəqs kollektivlərimizin reklam çarxları yoxdur. Mütləq təbliğat lazımdır. Yəni rəqs kollektivini tanıtmaq və kommersiya konsertlərinə çıxmaq üçün mütləq reklam çarxları lazımdır". Bununla yanaşı, Zakir müəllim Azərbaycan rəqslərinin gələcəyinə inandığını bildirdi: "Mən rəqsimizin gələcəyinə inanıram. Əgər xalq yaşayırsa, onun qanından keçən musiqi, rəqs də yaşayacaq".

Həftə içi.- 2009.- 20-21 yanvar.- S. 7.