Qocayeva A.

Almaniyanın Azərbaycandakı səfiri BSU-nun qonağı olub

Bu münasibətlə təşkil edilmiş mərasimdə çıxış edən universitetin rektoru, AMEA-nın müxbir üzvü, professor Kamal Abdullayev mərkəzin fəaliyyəti, filologiya fakültəsinin nəzdində yeni açılmış roman-german ixtisası, universitetlə Almaniya təhsil və elm mərkəzləri arasındakı əlaqələr, həyata keçirilən layihələr haqqında məlumat vermişdir. Bu əlaqələrin inkişaf perspektivlərindən danışan rektor Azərbaycanda alman mədəniyyətinin kifayət qədər izi qaldığını və bunların hər iki ölkənin mədəniyyətinin inkişafı üçün yararlı ola biləcəyini vurğulamışdır. Professor K.Abdullayev, eyni zamanda Azərbaycan mədəniyyətinin Almaniyadakı izlərinin tarixi-kulturoloji aspektdən öz tədqiqini gözlədiyini də bildirmişdir.

Səfir P.Stankina hər zaman BSU-da olarkən xoş anlar yaşadığını, bu görüşlərdən məmnunluq duyduğunu bildirmişdir. P.Stankina BSU-nun müəllim və tələbə heyətinin elmi potensialı, intellektual səviyyəsi haqqında kifayət qədər məlumatlı olduğunu nəzərə çatdırmışdır. O, BSU-nun Almaniya elm və tədris ocaqları ilə əməkdaşlığını yüksək qiymətləndirmiş, bu münasibətlərin daha da möhkəmlənməsi üçün əlindən gələni əsirgəməyəcəyini qeyd etmişdir. Demişdir ki, universitetdə yaradılan alman dili və mədəniyyəti mərkəzi iki ölkə ali məktəbləri, bütövlükdə isə mədəniyyətlərimiz arasında dostluq körpüsü rolunu oynayacaqdır.

Mərasimdə 2008-ci ildə Almaniyada keçirilən Azərbaycan mədəniyyəti ilinin böyük uğurla başa çatdığı və 2009-cü ilin Azərbaycanda Almaniya mədəniyyəti ili elan olunduğu xüsusi razılıq hissi ilə vurğulanmışdır. Qeyd olunmuşdur ki, bu ilin də uğurla başa çatması üçün təhsil ocaqlarının, o cümlədən BSU-nun da üzərinə böyük vəzifələr düşür.

Azərbaycan.- 2009.- 11 yanvar. S. 5.