Özünü doğrulda bilməyən kitabxanalar birləşəcək

 

Azərbaycanın Mədəniyyət və Turizm Nazirliyi bəyan edib ki, özünü doğrulda bilməyən kitabxanalar birləşəcək.

"Kitabxanalar bağlanmır, özünü doğrulda bilməyən, oxucu cəlb edə bilməyən və yaxud etmək istəməyən kitabxanalar birləşəcək", - dünən Trend News-a Mədəniyyət və Turizm Nazirliyinin Kitabxana işi sektorunun müdiri Lətifə Məmmədova məlumat verib.

Trend News-un arayışı: Azərbaycanda nazirliyin nəzdində 3800 kitabxana və kitabxana filialı var. Onlardan 74-ü paytaxtda fəaliyyət göstərir.

Azərbaycan Prezidenti 20 aprel 2007-ci ildə Azərbaycanda kitabxanaların fəaliyyətinin yaxşılaşdırılması haqqında Sərəncam verib. Mədəniyyət Turizm Nazirliyi tərəfindən Azərbaycan kitabxanalarının informasiya inkişafi modernləşdirilməsi (2008-2013-ci illər üçün) dövlət proqramı hazırlanıb həyata keçirilir.

Məmmədova deyib ki, Azərbaycanda mərkəzləşdirilmiş kitabxanalar, müasir mədəniyyət mərkəzləri yaranacaq. Kəndlərdə isə yeni metod tətbiq olunaraq model kənd kitabxanaları yaradılacaq.

Onun sözlərinə görə, nazirliyin nəzdində olan kitabxanaların avtomatlaşdırılmasında nəzərəçarpacaq qədər işlər görülür.

"Bu gün bizdə bütün dünyada olduğu kimi əsas problem oxucu problemidir kitabxanalar da oxucu cəlb etmək üçün yeni metodlardan istifadə edirlər. Bunu bacarmayan kitabxanaların taleyi isə sual altındadır. Əgər onlar öz piarları ilə məşğul ola bilmirlərsə, o qədər dövlət vəsaitini havaya sovurmaq olmaz. Bura əsasən kiçik kitabxanalar, kitabxana filialları statistik rəqəmləri cox aşağı səviyyədə olan kitabxanalar daxildir. Statistik göstəricilərə əsasən, əgər bir kitabxanaya il ərzində 10 nəfər gəlirsə, deməli bu kitabxana yaxşı işləmir ona ehtiyac yoxdu", - Məmmədova əlavə edib.

 

İki sahil.- 2009.- 23 yanvar.- S. 8.