Şəxsiyyətlər muzeyi Xaçmaza yaraşıq verir

Azərbaycan Prezidenti İlham Əliyev dekabrın 7-də Xaçmaz şəhərində açıq səma altında yaradılmış Şəxsiyyətlər muzeyi ilə də tanış oldu.
Muzeyin girəcəyini xalqımızın ümummilli lideri Heydər Əliyevin və Prezident İlham Əliyevin böyük portretləri bəzəyir.
Dövlətimizin başçısına məlumat verildi ki, bu, Azərbaycanda ilk belə muzeydir. Burada salınmış parkda Azərbaycan ədəbiyyatı və incəsənətinin inkişafında böyük xidmətlər göstərmiş 14 görkəmli şəxsiyyətin — Məhəmməd Füzuli, Molla Pənah Vaqif, Xurşidbanu Natəvan, Mirzə Ələkbər Sabir, Cəlil Məmmədquluzadə, Hüseyn Cavid, Cəfər Cabbarlı, Üzeyir Hacıbəyov, Müslüm Maqomayev, Qara Qarayev, Fikrət Əmirov, Niyazi, Rəşid Behbudov və Şövkət Ələkbərovanın büstləri, dahi Nizami Gəncəvinin heykəli ucaldılmışdır.
Parkda müasir fəvvarələr quraşdırılmış, oturacaqlar qoyulmuşdur. Yaxınlıqda mərkəzi kitabxana yerləşir.
Prezident İlham Əliyev yeni tipli muzeyin xüsusi zövqlə layihələndirildiyini söylədi, digər şəhər və qəsəbələrdə də açıq tipli muzeylərin yaradılmasının zəruriliyini bildirdi.
AzərTAc
Mədəniyyət və istirahət parkı ilə tanışlıq
Azərbaycan Prezidenti İlham Əliyev dekabrın 7-də Xaçmaz mədəniyyət və istirahət parkında da olmuşdur.
Şəhər sakinlərinin istirahətindən ötrü gözəl şəraiti olan parkda uşaqlar üçün xüsusi guşələr yaradılmış, müxtəlif yelləncəklər, oyuncaqlar quraşdırılmışdır. Süni çaylar, şəlalə və fəvvarələr istirahət guşəsinə xüsusi yaraşıq verir. Parkda 50 növ ağac əkilmişdir.
Parkı gəzən Prezident İlham Əliyev burada yaradılmış şəraiti, səliqə-sahmanı yüksək qiymətləndirdi

Xalq qəzeti.-2006.-8 dekabr.-S.4.