Xatun

Qazaxıstanda milli mətbəx festivalı keçirilib

Qazaxıstanın Pavlodar şəhərindəki "Vətən" Azərbaycan Mədəniyyət Mərkəzində milli mətbəx festivalı keçirilib. Tədbirdə şəhərdə fəaliyyət göstərən 16 mədəniyyət mərkəzinin rəhbərləri, diasporumuzun üzvləri iştirak ediblər. Mərkəzin aşpazları festival iştirakçılarına Azərbaycanın müxtəlif yeməkləri və şirniyyatlarını təqdim ediblər. Milli geyimdə olan sənət adamlarının ifa etdiyi mahnı və rəqslərini festivalın beş nəfərdən ibarət münsiflər heyəti qiymətləndirib.
Festivalda çıxış edən təşkilat komitəsinin üzvləri tədbirin keçirilməsində məqsədin müxtəlif xalqların milli mətbəxi və musiqisi ilə tanış olmaq, xalqlar arasında dostluq və qardaşlıq münasibətləri yaratmaqdan ibarət olduğunu qeyd ediblər. Azərbaycanın milli mətbəxinə həsr olunmuş bu festivalı tədbir iştirakçıları böyük maraqla qarşılayıblar.
Tədbirin sonunda "Vətən" Azərbaycan Mədəniyyət Mərkəzi aşpazlar arasında seçilən qaliblərə festivalın diplomlarını təqdim edib. Mərkəzin sədr müavini Rəsul Ələkbərov milli mətbəximizin, mədəniyyətimizin təbliği istiqamətində belə tədbirlərin davamlı olaraq keçirildiyini qeyd edib.
Festivalın səhəri günü həmin şəhərdə Azərbaycanın "Bazar günü məktəbi"nin on yaşı münasibəti ilə mərasim təşkil olunub. Tədbirdə Pavlodar vilayət hakimiyyətinin və "Vətən" Azərbaycan Mədəniyyət Mərkəzinin rəhbərləri, valideyn və şagirdlər iştirak ediblər. Məktəbin yetirmələri dövlət himnimizi səsləndirib və ana dilində şeirlər söyləyiblər.
Məktəbin direktoru Elmira Zeynalova orada Azərbaycan dilinin tədrisinə xüsusi diqqət yetirildiyini çıxışında vurğulayıb.

Ayna.- 2006.- 22dekabr. S. 8.