Milli azlıqların mədəni irsi və müasirlik" mövzusunda konfrans keçirilmişdir

Dekabrın 6-da Mədəniyyət və Turizm Nazirliyinin təşkilatçılığı ilə muzey mərkəzində "Azərbaycan - doğma diyar" festivalı çərçivəsində "Milli azlıqların mədəni irsi və müasirlik" mövzusunda konfrans keçirilmişdir.
Mədəniyyət və turizm naziri Əbülfəs Qarayev tədbiri açaraq konfransın əhəmiyyətindən, milli azlıqların mədəni və mənəvi irsinə ölkəmizdə göstərilən qayğıkeş münasibətdən danışmışdır.
Bildirmişdir ki, Azərbaycan rəhbərliyinin düzgün milli siyasəti nəticəsində ölkəmizdə öz mədəniyyətlərini və dəyərlərini qoruyub saxlamaq və inkişaf etdirmək üçün milli azlıqlara hər cür imkan və şərait yaradılmışdır.
Tədbirdə akademik Teymur Bünyadov "Heydər Əliyev azərbaycançılıq ideologiyasının banisidir", fəlsəfə elmləri doktoru, professor Gülnaz Abdullazadə "Azərbaycanda yaşayan milli azlıqların və etnik qrupların mədəni irsinin öyrənilməsində elmi folklor ekspedisiyalarının rolu və əhəmiyyəti", filologiya elmləri doktoru, professor Məhərrəm Qasımlı "Dağıstan xalqlarının folklorunda Azərbaycan aşıq sənətinin yeri", Mədəniyyət və Turizm Nazirliyinin musiqi sektorunun müdiri, professor Fərəh Əliyeva "XX əsrin əvvəllərində Azərbaycanın mədəni həyatında milli azlıqların musiqi sənətinin təmsil olunması" mövzularında məruzələr etmişlər.
Xarici ölkələrin respublikamızdakı səfirlikləri nümayəndələrinin də iştirak etdikləri tədbirdə mövzu ilə bağlı ətraflı fikir mübadiləsi aparılmışdır.

Azərbayacan.-2006.-7 dekabr.-S.5.