Zümrüd

 

Heydər Əliyevin Azərbaycan rəssamlıq sənətində böyük rolu olub

 

Fərhad Xəlilov: "65 yaşlı quruma rəhbərlik etmək çox böyük məsuliyyət tələb edir"

 

Azərbaycan Rəssamlar ittifaqının yaranmasının 65 illiyi münasibəti ilə ittifaqın sədri, xalq rəssamı Fərhad Xəlilov mətbuat konfransı keçirib.

Tədbirdə çıxış edən Fərhad Xəlilov rəhbərlik etdiyi qurumun tarixi haqqında danışıb: "Bu yubiley mərasimi Azərbaycan rəssamları üçün olduqca önəmli hadisa hesab olunur. Çünki məhz bu quruma Azəbaycanın 1300-dən artıq rəssamı üzvdür. Yubileylə əlaqədar olaraq Azərbaycan rəssamlıq sənətində olduqca böyük rolu olmuş mərhum dövlət başçımız Heydər Əliyevin qəbirüstü abidəsini ziyarət etdik. 65 yaşına qədəm qoyan bir quruma rəhbərlik etmək çox böyük məsuliyyət tələb edir". F. Xəlilov bildirib ki, yubileylə əlaqədar bir sıra rəssamlara fəxri adlar veriləcək və ittifaqın təsis etdiyi qızıl medallar paylanacaq: Bu yubileya dövlət səviyyəsində çox güclü hazırlaşmışıq. Artıq silsilə tədbirlərə start verdik və dekabrın sonuna kimi nəzərdə tutduğumuz layihələri gərçəkləşdirəcəyik. Yubileyimizlə bağlı dekabrın 14-də "Uşaq yaradıcılığı", "Gənc rəssamların yaradıcılığı", dekabrın 15-də "Retro" sərgiləri açılacaq". İttifaq sədri bildirib ki, dekabrın 18-də yubiley tədbirlərinin davamı olaraq Sultan Məhəmməd adına xüsusi mükafata namizədlərin əsərlərindən ibarət sərginin təşkili və medal və mükafatların təqdimatı keçiriləcək. Yubileylə əlaqədar Azərbaycana gələn Parisdə yaşayan həmyerlimiz Toğrul Nərimanbəyov mətbuat konfransında çıxışı zamanı ölkəmizdə rəssamlıq sənətinin inkişafından danışıb. Onun sözlərinə görə, bu gün Azərbaycan torpağı yaradıcılıqla məşğul olmaq üçün ən gözəl məkandır. Tədbirdə 65 illik yubileyə həsr olunmuş "Müasir Azərbaycanın təsviri sənət ustaları" adlı kataloq da təqdim olunub.

 

Səs.- 2006.- 14 dekabr.- S.12.