Maestro Niyazinin xatirə lövhəsinin açılışı olmuşdur

Dekabrın 25-də Bülbül prospektindəki 21 nömrəli binada Azərbaycan musiqisinin korifeyi, dünya şöhrətli dirijor maestro Niyazinin xatirə lövhəsi açılmışdır. Mərasimə respublikanın rəsmi şəxsləri, ictimaiyyətin nümayəndələri, maestronun dostları və yaradıcılığının pərəstişkarları toplaşmışdılar.
Mədəniyyət və turizm naziri Əbülfəs Qarayev, Bakı Musiqi Akademiyasının rektoru, professor Fərhad Bədəlbəyli, Bəstəkarlar İttifaqının katibi, professor Ramiz Zöhrabov, xalq artisti Xuraman Qasımova, xalq artisti, professor Sərvər Qəniyev Niyazi haqqında Azərbaycan bəstəkarlarının əsərlərini dünyada tanıdan böyük ustad, gənc istedadların qayğısına qalan, onları sevən və havadarlıq edən istedadlı pedaqoq kimi danışmış, onu gözəl, ünsiyyətcil və qonaqpərvər insan kimi xatırlamışlar.
Sonra müəllifi xalq rəssamı, professor Ömər Eldarov olan xatirə lövhəsinin üstündən örtük götürüldü.
Görkəmli musiqiçinin xatirəsinə göstərilən hörmət və ehtirama görə Prezident İlham Əliyevə, Bakı Şəhər İcra Hakimiyyətinə, Mədəniyyət və Turizm Nazirliyinə, mərasimə toplaşanlara minnətdarlıq bildirilmişdir.

Azərbaycan.-2006.-26 dekabr.-S.7.