Mükərrəmoğlu Mehdi

Dörd bədii filmin istehsalı davam edir

Artıq 2006-cı il başa çatmaq üzrədir. Milli kinomuz bu il hansı yeni filmləri ilə yadda qalacaq? Bu sualla Mədəniyyət və Turiz Nazirliyinin filmlərin istehsalı sektorunun müdiri, kinorejissor Cəmil Fərəcova müraciət etdik:
— Azərbaycan kinosu ildən-ilə öz istehsal gücünü artırmaqdadır. Belə ki, 2006-cı ildə “Azərbaycanfilm” kinostudiyasında dörd bədii filmin istehsalına başlanmış və bu gün onlar istehsalın müxtəlif mərhələlərindədir.
“Məhkumlar” filmini rejissor Mehriban Ələkbərzadə çəkir. Bu filmin ssenarisini yazıçı Çingiz Abdullayev qələmə almışdır. Film, adından da göründüyü kimi, çox maraqlı və ziddiyyətli bir mövzuya toxunur. Burada məhkumların həyatı ilə yanaşı, müəyyən lirik məqamlar da var. Artıq filmin istehsalı başa çatmaq üzrədir və yəqin ki, yeni ilin əvvəllərində biz bu filmi tamaşaçılara təqdim edə biləcəyik.
Dövlət sifarişi ilə çəkilən “Biz qayıdacağıq” filmini isə rejissor Elxan Qasımov çəkir. Maraqlı burasıdır ki, lentə alınan filmlərin əksəriyyətində Qarabağ mövzusu mühüm yer tutur. “Biz qayıdacağıq” da məhz bu mövzudadır.
Müasir mövzuda lentə alınmış “Günaydın, mələyim” flimini kinorejissor Oqtay Mirqasımov çəkir. Bundan əvvəl rejissorun “Ovsunçu” filmi ekranda müvəffəqiyyətlə nümayiş etdirilmişdir. Bir aktrisanın taleyi fonunda müasir həyatın problemlərindən bəhs edən rejissor filmi yaxın vaxtlarda tamamlayacaq.
Kinorejissor Şamil Nəcəfzadə isə “Qala” filminin çəkilişlərinə başlayıb. Qarabağ müharibəsinin yaratdığı problemlər filmin əsasını təşkil edir.
Daha iki film İlyas Əfəndiyevin “Hökmdar və qızı”, əsəri əsasında və Hüseyn Cavidin həyatı mövzusunda çəkilir. Ramiz Fətəliyev “Hökmdar və qızı” filmini “Tofi studiya — XXI” studiyasında lentə alır. “Cavid ömrü” filmini isə “Yeni dalğa” studiyasında Ramiz Həsənoğlu Anarın yazdığı ssenari əsasında çəkir. Hər iki film ümummilli lider Heydər Əliyevin sərəncamına uyğun olaraq ekranlaşdırılır.
Göründüyü kimi, 2006-cı ili milli kinomuzda əsaslı dönüş ili hesab etmək olar. Bu il həm də “Azərbaycanfilm”in əsaslı təmiri başlanmışdır və yaxın gələcəkdə studiya yeni, müasir avadanlıqlarla tam gücü ilə işləyəcəkdir.

Xalq qəzeti.-2006.-19dekabr.-S.7.